補習天王Dick Hui賴有趣笑男學生個名「Liana」好人 被網民狂鬧即笠水
廣告
香港人自細就有英文名，不過改英文名都係個學問，改左啲有特別意思嘅英文名俾人笑就唔好。日前數學「補習天王」許思明（Dick Hui）就去到一間中學演講，其中遇到一個自稱叫Liana男學生，由於「Liana」係個女仔名，Dick Hui就當眾話嗰位男同學「你叫自己Liana咁變態？」。言論引起網民大鬧，有網民批評Dick Hui自己英文名都唔好得去邊，「有咩資格笑人」。
數學補習天王Dick Hui去學校演講時公開取笑男學生的英文名
數學「補習天王」許思明（Dick Hui）尋日（15日）喺Insatgram 貼出喺學校演講嘅相，並打咗段長文分享當日「有趣」事情。Dick Hui就話獲邀到校演講，當中嗰陣同一個男同學互動，佢就問男同學叫咩名，男同學就答叫Liana。Dick Hui續指「「…」我呆左5秒。Liana ？Liana點讀都是女仔名呀！我忍唔佳問：「你⋯係男同學？」男同學點頭。的確，睇校服都是男生。」，然後當住全部同學面前公開表示「你叫自己Liana咁變態？」，引起全場恥笑。Dick Hui就話其實完結後自己一直都心不在焉。「因為，我邊離開邊仍在疑惑：果位男同學究竟係玩我？定… Baby…你…真…係…叫…Liana」
網民：你個英文名咪仲變態
大量網民鬧爆呢個post，亦為簡直係歧視人哋個名，亦有好多網民話其實Dick Hui呢個英文名更加差，因為Dick有男性性器官嘅意思，而配上Hui就等於「虛弱的男性性器官」，批評佢有咩資格笑人地個名。其後Dick Hui封鎖留言，之後更將帖文刪除。
關注男性性工作者及性別平權團體「午夜藍」就向Dick Hui發公開信，認為身為 Dick Hui 老師，甚至係「受不少學生景仰的名師」，佢呢種言論會令台下學生認為用性別開玩笑係可以接受。「玩笑和欺凌，很多時候只是一線之差，而我們往往低估了玩笑和欺凌的威力」，呼籲「是時候應停止開性別玩笑，大眾應鼓勵年輕人做自己、表達自己、愛自己」
Dick Hui今日（16日）就喺社交網站正式致歉，並列出2點澄清：「1.該學生本身不是叫Iiana，當時在課堂上純粹互動講笑，像大家平時上課跟我互動一樣。所以，那學生絕對沒有受欺凌，大家可以放心。2.多謝大家提醒，日後會更小心用詞。文章引起誤解或不安，本人在此深表歉意，並已刪除有關帖文。」
