餐廳英語詳盡攻略 由Book位到落單一應俱全 聖誕節平安夜約女仔食飯就唔怕出醜
撰文：Yin｜圖片來源：Netflix電影《愛情很難》劇照、unsplash@pablomerchanm、UNSPLASH@pat__、UNSPLASH@littlegreeneyes、unsplash@jaywennington
去高級餐廳，當然不能夠Walk-in直入，尤其是聖誕旺季。咁就自然需要打電話去Book位，毋須緊張，首先聽清楚對方講乜，通常對方接電話後都會講：
“Hello! This is NM restaurant. What can I help you?”（意思係，你好！這是NM餐廳，有咩可以幫到你？）
餐廳Book位英語
大家的目的當然係Book位，但英文同廣東話的概念有點差別，唔係Book位，而是Book枱。假設大家要Book星期五晚，同女朋友二人世界撐枱腳，你就可以講：
“I would like to reserve a table for two on Friday night.”（意思係，我想喺星期五晚訂一張兩人枱。）
如果想簡單一點，亦可以講：”I would like to make a reservation for two on Friday night.”
成晚流流長，餐廳一般都要做兩輪客，所以侍餐通常會問你食飯食幾多點，佢一般會話：
“What time would you like to have dinner?”（意思係，你希望甚麼時間吃晚餐？）
大家可能在平安夜為女朋友安排了其他節目，所以想早一點食飯，假設係約7點半，你只要簡單講：
“Half past seven, please.”（意思係，7點半，唔該。）
如果七點半有位，當然最好，但平安夜多人出街食飯，這個時段有可能無位，咁侍應一般會咁答你：
“Sorry, we are full booking at half past seven.”（意思指，唔好意思，我哋7點半的預約已經滿額。）
依個時候，與其自己不斷問有咩時間有位，不如直接問對方有咩時間揀：
“What time would be available for booking?”（意思係，有咩時間係可以預約？）
如果其他時段有位，侍應會答你：
“We have table available for both 6 o’clock and 8 o’clock.”（意思係，我哋6點同8點仲有枱。）
咁你可以揀你屬意的時間。假如你事先知道餐廳係有靚景，不妨嘗試喺Book位時問埋可唔可以坐近窗邊，你可以喺一開始問埋：
“Could we have a table by the window, please?” 或者 “We want atable by the windowif youhaveone.” （兩者意思都係，我哋想要一張近窗的枱。）
餐廳點餐英語
到了預約當日，係大家展示魅力嘅時候，就更加不能失禮。既然Book咗枱，嚟到就要話畀侍應知道，假設你係留名Book枱，就可以講：
“Hello! I’m John. I have a reservation for dinner.” （意思係，你好，我係John，我預咗枱食晚餐。）
入座之後，大家就開始睇吓想食乜嘢，如果唔想同侍應 “This This This”，可以簡單講：
“I would like to have XXX.（意思係，我想要XXX。）
如果覺得菜式名稱複雜兼難讀，有個取巧一點的方法，就係要求侍應推介，可以避免要自己讀出難搞的菜名，但最好閣下就唔會太揀飲擇食。
“What would you recommend?”（意思係，你有咩提議?）
或者可以針對性咁問有咩主菜、前菜或甜品推介：
“Any Suggestion for the main course (appetizers/dessert)?”（意思係，主菜(前菜/甜品)有咩建議?）
食完飯就要叫埋單，我哋喺一般餐廳會舉手，然後手指指向枱面轉轉圈，但這個手勢唔係人人都明。如果要講，又可以點呢？
“May I have the bill?” 或者 “I would like to pay the bill.”
上述的英語攻略用字偏向簡單，不會太難讀，亦適合喺大部分情況使用，希望大家可以把握剩餘的時間，練好這幾句實用英語，可以同女朋友喺聖誕度過一個美好的晚上。
