【網購中伏實錄】明和電機老闆上網買中國Mon中伏！改裝後轉售仲賺到錢！網民：真係勇者嚟
撰文：馬高斯 ｜圖片來源：twitter、微博、天涯｜編輯：海月
驚大家唔識佢，簡單介紹一下先，今次網購中伏嘅主角就係：明和電機社長土佐信道。以推出自家製的惡搞樂器而出名，例如能夠發出千變萬化，又充滿魔性聲音「揉捏蝌蚪」。平時創意多多又大玩惡搞的社長今次遇著對手，事源佢最近喺中國購物網站Wish見到一款價值 2500日元（約港幣$186）嘅10.1 吋熒幕，見咁抵就一次過入手5個。點知貨到開箱發現網購中伏，呢個「熒幕」原來係印上熒幕圖案嘅「鐵板」，真係黑人問號。
網購中伏？唔怕！好彩社長遇強越強，最後佢喺塊鐵板度貼上幾個明和電機推出嘅磁石貼，再擺上官網以 2600日元轉售，幾個鐘都無已經全數售罄。最後仲要喺Twitter講出勝利宣言：自己成功賺到 500 日元差額。真係完美呈現佢嘅惡搞有趣風格。
社長有人氣又有急材，網購中伏就可以成功反擊啫，一般人網購中伏就只有硬食，特別喺淘寶 「雙11」都係「中伏旺季」，就等我哋回顧一下令人懷疑人生嘅伏物！
網購中伏實錄
網購中伏1：
有網民買咗一個迷你雪櫃，參考圖片可見能夠擺到少量水果同一罐汽水，點知竟然細到一支礦泉水都放唔入。
網購中伏2：
跟住介紹呢條長到拉上去胸度的紅色包臀褲，睇怕都著唔到出街，不過可以喺屋企扮吓美人魚嘅。
網購中伏3：
蛋糕團購同樣會出事，睇圖見隻小火龍配蠟燭好似識噴火咁，創意滿分，點知到貨時發現走晒樣。另一單個Hello Kitty蛋糕同樣出晒事，淨係識畫火柴人的小編表示，都畫得靚過佢。
網購中伏4：
最後有位好爸爸見就快到萬聖節，喺淘寶買件超人衫cosplay成超人Zero，諗住畀個驚喜仔仔，點知著出嚟變咗驚嚇同恥笑嘅喜感。
