召喚燒賣關注組！連登網民：自己蒸燒賣、好食過街外多多聲！
廣告
燒賣可以話係最常見的香港街頭小食之一，小編我細細個返學前叮燒賣做早餐，BBQ果陣又會燒燒賣，炸燒賣又係一絕，人生入面好似與燒賣不可分割咁。最近連登出現一個post，指只要自己蒸過燒賣嚟食，就返唔到轉頭，唔會再想食街外嘅燒賣。於是好快就引起大家嘅熱烈討論，到底用咩醬料配搭最好呢？又話者，唔係喎，其實邊間邊間舖頭嘅燒賣好食喎！
撰文：馬高斯 ｜圖片來源：連登討論區、金龍燒賣｜編輯：海月
話說事源有位叫「嘩」嘅網民，喺連登討論區出post，指只要自己蒸過燒賣嚟食，就唔會再想食街外嘅燒賣。認為價錢超平，幾十蚊就一大袋，次次都蒸幾十粒食，勁滿足，喺出面幾十蚊頂多買三四串。除此之外，亦覺得可能係新鮮蒸起，就算係一pack pack咩公仔牌都特別好食，直指街外食嘅中伏機率極高。自己買支靚辣油、甜豉油，計一計CP值，真係唔會想再喺街食！
唔少網民都認同樓主嘅講法，原來都唔少人會成袋買返屋企，燒賣癮起就蒸10粒8粒食。始終同一價錢，自己蒸份量又多啲，又衛生啲，而且街外嘅燒賣大多都係成舊麵粉咁，口感又鬆又散，實在好難頂！
不過都有網民留言撐街外某啲舖頭嘅燒肉係好好食；又有人係撐店舖，認為商戶要交租，你估唔使賺錢咩；亦有人表示，原來講緊cheap cheap魚肉燒賣，出番去先。
唔知大家鍾唔鍾意食燒賣？食燒賣又會係自己蒸定出街食？
