港男慨嘆香港女尊男卑 奉勸巴打做男人要學識保護自己 巴打有共鳴 齊齊大呻香港男人之苦

撰文：Yin｜圖片來源：LIHKG討論區截圖

香港唔似韓國同日本社會咁大男人主義，香港女人嘅地位已經唔會輸蝕畀男人，甚至比男人有過之而無不及，變成女尊男卑。有港男就喺LIHKG討論區發帖，奉勸各位巴打要學識保護自己，唔好畀女人壓榨。

男人一樣青春有限 女人無畀錢買樓唔好落名

港男樓主話，假如要結婚買樓，而層樓嘅首期月供係自己畀晒，就千祈唔好落老婆個名；叫各位巴打可以喺婚前搵定律師，簽定離婚財產分配協議，仲話如果女人真係愛你，佢唔會打算離開你，就一定會簽。(編註: 根據以往新聞報道，離婚財產分配協議喺香港嘅效力同外國有差別，未必真係徹底保障到唔駛分身家。)

依位港男又講到男人都一樣係青春有限，一遇到成日脾氣、無人生計劃、儲唔到錢、成日買嘢嘅女人，就應該果斷分手，尋找更好嘅下一個。

樓主建議香港男人唔好向女伴透露密碼

港男樓主建議各位巴打，唔好將任何密碼透露畀女人知道，以防遭到女方日後人格謀殺，形容王力宏已經係前車可鑑；仲要定期保留照顧女方嘅證據，例如送過幾多禮物、比過幾多家用、甚至係花咗幾多心思哄佢等等，避免一旦反面，遭到抹黑就變成渣男。

樓主仲提醒巴打們，唔好畀一刻熱情衝昏頭腦，要搵一個懂得愛錫你的女人，如果對方成日鬧你同兄弟飲酒打機、買埋啲無謂嘢，形容依種女人係自我中心，只會迫男人迎合佢，唔係真心愛你。

網友呻男人付出完 日韓女友起碼好好笑容講多謝

喺香港做人好攰，做男人就更攰。帖文一出，馬上引起眾多巴打嘅共鳴，一齊大呻香港男人之苦。有網友直言，香港男人最慘係付出完，仲要受氣、唔開心；雖然要求男友買禮物、食好嘢，好多地方嘅女人都會要求，但好似日本、韓國、台灣等地方嘅女人會「好好笑容咁講多謝」，令男人好受落、好願意為佢付出，而香港女人好多時求其講一句多謝就算。

亦有巴打話，唔明白香港男人點解喺結婚後，要將份人工交畀老婆管，仲要好多人都覺得依種做法係正常。

網友盤點香港男人總係要付出較多心思同金錢

仲有網友一口氣盤點咗香港男人在男女關係上方面，男人總係要不斷挖空心思去討好對方，財政上亦往往係付出比較多嘅一方。

女鏡粉稱老公係前夫 中佬質問掉轉係男人可以咁做？

有中年網友就話，一早已經覺得男女關係當中，好多事對男人唔公平，並舉出90年代好多男人為求換Snoopy氹女朋友，日日食麥當勞；到近期大批女鏡粉追星，自稱嫁咗畀Mirror，而一眾老公和男朋友無厘頭變成「前夫」。依位網友反問，有無可能性別對掉，男人叫某某女星做老婆，仲將老婆同女朋友變「前妻」。

男人唔好睇愛情太重 當自己情聖

另有網友話，喺男女關係中，男人唔好將愛情睇得太重，唔好以為自己係情聖，抱住「合則來，不合則去」嘅態度，先至可以保護到自己。