日本「業務超市」突然大埔開店、大J踢爆假貨疑雲！北勝水產變北騰水產？！內有官方回應

【業務超市假貨】疫情期間好多行業都大受影響，好多以為會頂得住嘅大集團都捱唔住，反而Donki、壽司郎、Sukiya就越開越多間，可見香港人對日本嘅愛係有幾深！最近日本一間好出名嘅「業務超市」突然開咗香港分店。喺無乜宣傳、首間分店又唔算大、地理位置又奇怪的情況下，本身已經相當之可疑。點知仲被發現疑似賣冒版帆立貝！

撰文：馬高斯｜圖片來源：YouTube@JASON｜編輯：海月

日本「業務超市」突然大埔開店

首先介紹下咩係「業務超市」，現時「業務超市（業務スーパー）」喺日本有超過900間分店，售賣嘅商品一向份量又多價錢又抵咁，唔少餐廳會去入貨，亦廣受家庭主婦歡迎。就喺4月30日突然喺大埔廣福道開張，對於熱愛日本嘅香港人嚟講，真係又驚又喜，開始熱烈討論呢間「業務超市」嘅真偽！

不過Youtuber大J就喺5月6日上載影片，質疑呢間超市售賣冒牌帆立貝，發現包裝盒上嘅字眼有出入，例如日本產係「北勝水產」嘅「HOKUSHO Seafood」帆立貝柱，但香港分店販賣嘅係「北騰水產」嘅「HOKASHO Seafood」，呢種字眼上嘅微妙出入，相當之惹人懷疑。

另外，大J仲發現香港分店有部份貨品，並唔係日本嘅業務超市出售商品，例如包裝上有簡體字嘅貨品，印住「北极貝」、「野生捕捞」、「无添加」嘅簡體字嘅加拿大北極貝。點解日本嘅業務超市香港分店，會賣非日本嘅貨品？

不過跟據大J片中嘅解說，見到有網民以電郵方式，去查詢過日本嘅業務超市，對方回應香港呢間的確係業務超市，不過唔係日本直營，而係有香港公司代理經營。

然後喺5月7日大J上載關於今次假貨疑雲後續影片，香港分店賣緊嘅「北騰水產」嘅「HOKASHO Seafood」帆立貝柱，標示嘅日本地址並唔係「北騰水產」，而係「高田商店」，打電話去問過清楚之後，發現並唔係屬於呢間商店嘅貨品，而且佢哋已經唔係第一次接到海外電話查詢假貨問題。咁就真相大白，所以係香港嘅業務超市從供應商入到假貨。

另外，日本總部亦容許香港店自己入貨，但同時沒有提到比率有多少。香港負責人方先生就表示：「假貨我要了解一下，要回去看看。但我有沒有標明是日本貨呢？因為我沒有標明，如果事實是假貨，我會追究那個供應商，是他們用疑似的包裝令我這樣。而且不是我入貨的，是供應商入貨給我」。