日本公園｜玩到隨時有童年陰影！千奇百趣設施隨時玩到變絕子絕孫

日本公園｜玩到隨時有童年陰影！千奇百趣設施隨時玩到變絕子絕孫

日本公園呢條香蕉型滑梯，被日本網民稱為「破壞香蕉專用嘅香蕉」，因為香蕉滑梯採用一開三嘅設計，睇返滑梯上嘅教學說明，係畀6至12歲小朋友可以自行選擇瀡落其中一個出口，大大增加樂趣！不過唔少網民就覺得係好心做壞事，設計中存有問題，如果小朋友瀡嗰陣係張開隻腳，分分鐘會撞中下面，搞到小朋友細細個就要經歷「男人最痛」。

咁奇特的滑梯好快就成為話題，仲有網民惡搞畫出分屍圖！

千奇百趣又點止香蕉滑梯，來自中國嘅熊貓，懶洋洋又肥得嚟可愛，一直深受日本人愛戴，喺日本各地公園會搵到好多相關嘅玩樂設施，不過外觀就比較詭異，甚至令人不安！

日本公園：熊貓公園設施

過去日本綜藝節目《周一開始熬夜（月曜から夜ふかし）》就介紹咗大分市北下郡公園嘅一座奇怪熊貓雕像，相片一公開小編我都睇到O晒咀，呢隻嘢你同我講係熊貓？！正所謂有奶便是娘，唔通有黑眼圈就一定係熊貓？！

呢隻嘢個樣，拍得住平時大陸啲翻版高達、超人同迪士尼樂園咁！係咪想以其人之道，還治其人之身，去反擊大陸？（笑）

至於呢個熊貓滑梯，可能低處未算低，呢個第一眼望落就正正常常，不過細心啲觀察，小朋友喺背後爬上滑梯，再從肚入面瀡落嚟。唔好意思，我呢啲大人比較多雜念，感覺上好血淋淋。

呢隻貪食嘅熊貓，本應係好可愛，唔知係咪得罪咗設計師，最後變咗異形樣，夜晚見到認真驚嚇！

日本公園：超危險公園設施

剛才介紹嘅香蕉型滑梯，都叫做只係破壞蛋蛋，又未有生命危險，不過以下介紹嘅設施真係玩命咁玩！話說千葉縣有一個清水公園，園入面有個水上樂園，當中嘅水上吊橋、水上泰山，仲有喺水面跑嘅設施，難度又高，隨時都會跳落水，畀小朋友玩真係幾危險！

跟住我哋飛去栃木縣，喺新栃木站前有一個細細嘅公園，遠望好似正正常常，行近啲一睇，嘩！個滑梯同前面牆壁距離超近，瀡落去嘅衝力撞埋牆度，唔好話小朋友，大人都好傷！