撒隆巴斯原來仲係「殺X巴斯」 網民分享另類神奇用法！
廣告
要數居家必備良品，撒隆巴斯（Salonpas）必定占一席位，而撒隆巴斯嘅鎮痛作用相信唔少打工仔係夜深人靜嘅時候靠撒隆巴斯渡過唔少肩頸脖痛、腰酸背痛、肌肉疼痛嘅夜晚。而最近有一位台妹喺網上分享男朋友從媽媽得來嘅偏方：用撒隆巴斯對付石頭瘡。而該名台妹仲圖文並茂同網民分享使用方法，令網民嘖嘖稱奇！
撒隆巴斯變「殺瘡巴斯」，用嚟對付煩人石頭瘡
石頭瘡係一種較難處理嘅暗瘡，其成因有好多：皮脂腺發炎、壓力大、荷爾蒙失調等都會導致石頭瘡出現，形成暗瘡結節，令皮膚摸上去凹凸不平，並出現紅腫甚至腫痛，令人苦惱。而一名台妹就於討論區上以「原來一直誤會撒隆帕斯（港譯：撒隆巴斯）」為題，稱有次同男朋友講電話時聽到佢要去拎撒隆巴斯，正當台妹以為男朋友受傷之際，男朋友竟然話佢知撒隆巴斯係用來對付石頭瘡，更稱方法係媽媽教佢嘅。而該名台妹亦討論區上分享男朋友使用前後對比圖，效果居然頗為顯著。
網民留言親身試過，滅瘡功效全因成份水楊酸？
發文一出除咗有網民稱聞所未聞，紛紛稱奇外，有部分網民留言分享自己曾經試用過此，除個別網民表示使用後並無改善外，大部分稱使用過嘅網民表示偏方很好用，對付石頭瘡有一定功效。但到底撒隆巴斯有咩成分，令大家相信佢可以對付石頭瘡呢？ 查看藥廠提供嘅成份表所見，撒隆巴斯含：水楊酸甲酯、薄荷醇、維生素E ⋯⋯等成份。而水楊酸常見應用在改善暗瘡問題上，令不少人士認為撒隆巴斯當中嘅水楊酸成份以及其「藥性滲透力強」嘅賣點，令到撒隆巴斯可以消除暗瘡。不過呢個說法並未能獲皮膚科醫生認同！
大S早年曾教授此偏方，被批錯教
而撒隆巴斯對付石頭瘡方法原來流傳已久，大S（徐熙媛）早年曾在自己嘅《美容大王》書中提及過使用撒隆巴斯可有效對付暗瘡：「如果你發現臉上長出紅紅的一塊，而且壓下去會痛，代表它是一颗即將冒出的大痘痘，這時候你可以把撒隆巴斯剪成蓋住痘痘的大小，一段時間後它就會消了。」大S更提醒指此方法只適合偶爾生暗瘡人士，長期爆瘡人士或内分泌失調者則勿亂試。而當時呢個說法獲大部分台灣皮膚科醫師反對，皮膚科醫師認為撒隆巴斯含有嘅水楊酸濃度太高，加上薄荷成分，有可能為能消滅暗瘡之餘，反而會刺激皮膚引致皮膚炎。
