【打工仔悲歌】偷懶蛇王剋星！中國公司派智能坐墊監控員工一舉一動

撰文：馬高斯 ｜圖片來源：19樓論壇、微博、杭州荷博物聯公司、愛回家｜編輯：海月

【打工仔悲歌】偷懶蛇王剋星！大陸公司派智能坐墊監控員工一舉一動

呢款智能型坐墊係由一間杭州荷博物聯公司研發，作為產品測試而派畀員工，話收集身體數據以便完善產品，仲話坐墊能夠檢測使用者嘅健康狀況，包括測量心率、呼吸，仲會糾正員工嘅不良坐姿等等，呢啲數據會傳送到手機app內睇到。

派發初期有位自稱係員工嘅網民「蘋果橙子妹妹」，喺微博出post表示，坐墊感應到你長時間唔郁，或者不良坐姿導致身體疲勞，會貼心提示用家，然後連動電腦玩飛機大戰遊戲，跟住遊戲去扭吓條腰，伸展吓身體，成個人即刻舒服晒。呢位員工真係擦鞋擦到發晒光！

不過另一位員工就表示有啲驚，佢話有一日被人事部急call，問佢點解每朝嘅10點至10點半都唔喺你嘅座位？仲提醒佢小心公司會扣你獎金！呢個智能坐墊檢測到咁多身體數據，公司又會睇到，就連人事部都睇到，打份工啫，都要被人監控一舉一動。

呢件事隨即成為當地討論區嘅熱話，引起好多中國網民強烈回應。由於事情引起大量輿論，公司喺微博度解話，就話原意係收集實驗數據，並非監控員工，收集所得數據唔會對員工嘅獎金、薪金有任何影響。仲話參與測試嘅員工早已知情，仲簽咗同意書，不過文件就只得英文版本。所以話有時真係唔可以懶，簽任何文件之前，唔好見到水蛇春咁長就飛過唔睇，唔睇清楚先簽，畀人賣咗豬仔都無人救到你！