小學生壓力爆煲地鐵淚崩哭訴：知唔知好辛苦！（有片）

每位家長都希望能夠「望子成龍」，而香港學生基本上24小時都不夠用，除了要應付忙碌的學業外，家人又會要求自己仔女可以多元發展，參加不同課外活動，一係就多啲去補習班，為未來去鋪好路。

小學生壓力爆煲地鐵淚崩哭訴：知唔知好辛苦！

近日YouTube頻道「香港新聞突發時事合集」上傳一則影片，以「【教育制度】小學生因升班感壓力大，在地鐵車廂對媽媽哭訴」為題。影片長度為大約5分鐘，而片中可聽見一位小學生女童崩潰地向母親哭訴，由對話可得知呢位女童壓力爆晒煲。

小學生女童壓力爆煲 — 女童壓力爆煲（圖片來源：YouTube頻道@香港新聞突發時事合集）

升2年級已壓力爆煲

女童在影片中淚崩道：「好辛苦，好唔舒服㗎啦，我仲要日日喺度返學，好辛苦！我真係好辛苦㗎，妳知唔知啊？妳都唔俾空間我㗎！」、「我好辛苦先可以升到2年級㗎，我唔係好似妳咁樣㗎，妳而家乜嘢都唔俾我睇啦，妳而家好唔鍾意我，妳可唔可以叫我即刻走囉！」、「好難頂呀，你知唔知呀，你成日都唔明我！」。

小學生只係升小二 — 只係升小二（圖片來源：YouTube頻道@香港新聞突發時事合集）

女童聲淚俱下

母親則回應指：「過2日妳走㗎啦」，女童繼續哭訴指：「我唔想過2日！我想即刻走啊，我唔想等啦！我想走好耐㗎啦，妳嘥咗（時間）好耐啦！你浪費咗我啲時間啦！」。之後母親反問：「妳做咗啲咩嘢幫我啊？」，女童則表明指：「咁妳想唔想要我啫？妳唔想要我嘅，我即刻走囉，好唔好？」，又指母親不明白自己，十分可憐。

淚崩指「無朋友」

其後女童都指出「同學唔鍾意我」、「你哋啲大人都無得改嘅」、「唔好阻我啲時間啊，我已經夠皮㗎啦，唔好玩我得唔得啫！頂唔順啦，生存呢個世界上㗎！」。由談話中都聽得出該名女童壓力爆晒煲，令唔少網民都替其感到心痛，直言「心酸」、「好心痛」、「聽得出個妹妹真係好大壓力」，亦有網民認為母親應找專業人士去疏導女兒情緒：「小朋友的心理壓力很大，不要以為小事，要找專業人士疏導」。

網民指係教育制度問題

不過都有網民認為是香港的教育制度出現問題，直插：成日話香港教育制度，父母本身都不斷壓迫子女，一日學呢樣學嗰樣，又補習！」、「家長係不自知，家長要多與子女溝通，聽佢講並唔係主要因升學壓力大！唔該家長們唔好成日逼子女，只求分數」、「香港填鴨式教育逼得小朋友好慘，學校加埋家長壓力好大，所以平時一定要同小朋友多啲傾計，紓緩他們的壓力創傷」。