《哈利波特》20週年！首間旗艦店登陸紐約百老匯大街
廣告
佛地魔、「去去武器走」呢啲魔法咒語，8、90後香港人一定好深刻，想當年《哈利波特》熱潮好犀利，睇完電影之後，個個同學都攞住本厚到乜咁嘅書去追原作小說。原來唔經唔覺，第一套電影上映都已經20週年，喺紐約百老匯大街935號，就開設全球首間《哈利波特》旗艦店，售賣各款週邊商品之外，仲有唔少電影場景可以打卡！
撰文：馬高斯 ｜圖片來源：Twitter@The Potter Collector｜編輯：海月
《哈利波特》20週年
《哈利波特》係英國作家 JK 羅琳推出嘅系列小說，故事舞台係奇幻嘅魔法世界，可以話係廣受全球大人同細路喜愛。去到 2001 年，《哈利波特》電影版正式面世，橫跨10年都有續作電影陪住唔少人成長，而系列電影最終篇《哈利波特：死神的聖物2》就喺 2011 年上映。雖然電影完結，但係仲有《怪獸與牠們的產地》、《哈利波特》舞台劇，甚至手機遊戲，依然延續魔法熱潮！
15個場景打卡位
正好今年係《哈利波特》電影面世20週年，喺紐約百老匯大街935號就開設全球首間《哈利波特》旗艦店！旗艦店一共3層，超過560坪大空間，除咗大量週邊商品令哈波迷花多眼亂之外，更有15個主題區等住大家去打卡留念！，例如霍格華茲校長鄧不利多飼養嘅鳳凰「佛客使」雕像，會喺入口處迎接大家，亦有魔法部電話亭、海格嘅靴子等擺設，等住大家去發掘！
爆買哈利波特精品
哈利波特旗艦店商品多多，從相片中可見，有超齊全嘅魔杖、貓頭鷹、家庭小精靈「多比」嘅毛公仔，亦有 1:1 飛天掃把「光輪2000」，相信哈利迷一定睇得眼睛發晒光！
兩大VR互動體驗
另外，旗艦店增設有唔同嘅互動，除咗購買魔杖時，會有特殊互動裝置之外，仲有「霍格華茲之亂（Chaos at Hogwarts）」同「巫師齊飛（Wizards Take Flight）」兩大VR體驗，等大家買得開心又玩得開心！
