女同事入錯男廁 令去緊廁所嘅男同事收HR警告信？網民紛紛鬧爆

喺男廁拉褲鏈收警告信？

有網民喺Facebook專頁「奴工處」發文分享返工奇趣事。該網民表示「女同事入錯男廁，見到咁啱拉緊褲鏈嘅我。佢竟然走咗去投訴我行為不當。而公司HR又真係出封警告信畀我，話我係男廁冇適當穿著，騷擾女同事。咁都得？我係咪要去一去平機會？」事件相當匪夷所思，亦令當事人好疑惑，發文問網民喺唔喺應該平機會投訴。

網民控訴人事部處理不當

事件引起網民熱烈討論，部分網民質疑該公司人事部處理不當。「條女On X ，間公司仲On X」、「應該去平機會告間公司hr」、「個HR咁戇居， 出埋信 Black and white畀你証明個女同事入過男廁」。人事部發出嘅警告信反而提供到證據幫事主證明今次事件。

熱心網民諗計幫事主解決

網民紛紛幫男同事諗計處理今次事件。「你跟佢入番女廁再去搵HR出封warning比佢先岩」、「報警告個女同事入男廁啦」，亦有網民提議可以寫封道歉信表示「自己唔應該喺男廁入面拉褲鏈俾佢見到，令佢覺得尷尬好對唔住」，並係公司群組提醒各位男同事「千祈唔好喺男廁入面拉褲鏈，呢種行為非常之不當同可恥」。

不過亦有網民表示「女人入男廁，男人收警告信，男人入女廁，男人入監倉」、「總之女人就係無敵，如果件事係男同事入錯女廁，男同事已經坐咁監」網民覺得如果今次事件男女調轉身份，結局可能會更加嚴重。