【不老症】電影情節現實發生？侏儒女假扮細路女圖殺養父母

【不老症】想當年有套港產片《殺人犯》，由「小朋友」講出一句心寒對白「我又諗起你老婆喇！」，諗起都毛骨悚然！勢估唔到，現實世界竟然發生有如電影故事的事件，喺美國有對夫婦收養小朋友。點知佢係擁有小朋友嘅身軀，大人嘅頭腦，不過佢唔係名偵探，而係貨真價實嘅死神，仲想置家人於死地！

撰文：馬高斯｜圖片來源：網上圖片、《殺人犯》及《孤疑》劇照｜編輯：海月

【不老症】電影情節現實發生？侏儒女假扮細路女圖殺養父母

現實中並無《柯南》嘅返老還童藥丸，不過就有一種病「不老症」。喺電影《殺人犯》中，由郭富城飾演嘅重案組總督察凌光，喺調查一宗命案時，發現所有證據都證明佢係兇手。後來發現真兇係佢領養嘅外型係6歲、心智係成人嘅孤兒，！另外，美國都有一齣恐怖片《孤疑》，一對夫婦同樣收養一9歲俄羅斯女童，後來發現佢竟然係一個33歲嘅愛沙尼亞成年女人！

而今次電影橋段發生喺美國一對夫婦身上！美國著名育兒專家Kristine Barnett同佢前夫Michael Barnett，喺2019年被落案起訴遺棄9歲養女。不過Kristine Barnett就辯稱，呢位「女童」已經係成年人，佢哋打算棄養時佢已經22歲。然後仲指出佢只係一個患上侏儒症嘅成年女子，係佢假扮成9歲女童，更直指養女患有精神錯亂，仲強調佢同前夫先係受害人！

事源兩人喺2010年收養咗一個嚟自烏克蘭嘅女童Natalia Grace，當時領養文件上寫明Natalia Grace係6歲。不過開始生活嘅一年內，Kristine Barnett多次遇到唔尋常嘅事情。例如女童曾經試圖想推佢去電圍欄；又試過將漂白水倒落佢杯咖啡；深夜時份成日企喺兩人面前，令佢哋無法入睡。以防萬一仲將所有利器收起。

當然口講無憑，都要有證據，Kristine Barnett解釋指，佢每月有月經，亦有成年人嘅牙齒，唯獨係無長高過。帶佢睇過好多醫生，證實咗佢患有嚴重嘅心理病，病徵仲要只會出現喺成年人嘅體內！加上有次幫佢沖涼，發現作為6歲女童陰毛未免太齊全。

正所謂日防夜防，家賊難防，更何況係想殺你嘅人。Natalia Grace曾經揚言喺兩人瞓著時殺死佢哋。後來夫婦急忙搵專家幫助，為Natalia Grace進行骨密度測試，證實出佢嘅實際年齡最少有14歲或以上。

到咗2012年，印第安納波利斯嘅馬里恩縣高等法院，就根據專家嘅醫學報告監定出Natalia Grace出生年份係1989年。於是兩夫婦喺2013年離開位於印第安纳州的住所，去加拿大展開新生活。咁離開之前，兩人幫Natalia Grace租咗間屋，仲預付咗全年租金。

心諗好嚟好去，事情可以告一段落，點知惡夢尚未完結！英國嘅《每日郵報》披露咗一份關於Natalia Grace嘅全新報告，指出醫學專家喺2010年對Natalia Grace進行骨密度測試，得出結論就話佢只得8歲。電光火石之間，蒂珀卡努縣警察部門即時控告Michael Barnett、Kristine Barnett兩人棄養。雖然Michael Barnett喺審訊中承認養女係未成年，不過兩人嘅律師就依然堅持係無罪，目前兩人獲准保釋。