W Hotel房務員明知女住客沖涼照入房？！港媽嬲到「免房租都唔收貨」

撰文：Andy｜圖片：W hotel 官網、香港staycation Facebook 截圖｜編輯：海月

W酒店房務員明知女住客沖涼都入房 港媽嬲到癲

人人佢staycation都想喺呢個疫情之下搵個地方放鬆下，不過有位港媽就喺Facebook抱怨佢去w hotel 冇放鬆到不特止，仲要被人激到一度火！到底發生咩事呢？

事主出post抱怨：「滿心歡喜諗住母親節同屋企人住下，最後住到一肚氣！前台服務態度極差！以後都唔會再住！」

原來，激嬲港媽嘅係w hotel房務員喺佢女兒浸浴期間拍卡入房！即使佢女兒強調自己沖緊涼，該房務人員都依然堅持話要入去查房！小編就唔知果個房務員想入房睇咩啦！！

港媽對此十分火滾，佢嬲道：「真係好有問題！五星級酒店我只係體驗到咁既服務！」

送嘅母親節蛋糕送成20分鐘都冇影 最後送上來融曬

一家人為咗慶祝母親節而staycation，當然就要有蛋糕啦。佢哋check in 時曾向前台提出幫手雪蛋糕，到時候再送上房。點知佢哋得到嘅回覆係：「雪蛋糕，我睇下有冇位先！」。雖然最後職員都有幫手雪蛋糕，不過對方惡劣嘅態度就令佢哋一家唔開心啦。

更過分嘅係，夜晚call蛋糕上房，等左20分鐘都未到。港媽稱：「本身都諗住算啦星期六又母親節一定會比較忙再等一陣，到等左30分鐘都真係忍唔住打左去問，收線2分鐘後就到左喇。」

喺大家都以為可以開心食由女女買嘅Zoe榛子蛋糕之際，一打開個蛋糕「個盒全部都係倒汗水，個蛋糕面溶溶地，一切落去成個溶到斜埋一邊！」全家人都又失望又嬲！

事後對於失職員工並冇跟進 回應投訴極度hea

對於呢2件事港媽同女女都落去前台投訴，前台聽到呢兩件事，道歉之後就叫佢哋上番房。之後入住期間就完全冇再做出任何跟進，好似咩事都冇發生過咁！

不過，港媽都坦言自己喺退房當晚收到酒店電話話要跟進。w hotel 就話下次入住三間房免一間房租，叫要求事主考慮下。但第二日港媽回覆w hotel 自己拒絕對方嘅處理方式，自此w hotel 唔再理事主。

港媽好嬲咁話：「到第三日我再問佢，佢第四日再回覆自己打左疫苗唔舒服要過兩日先再回覆到我！我真係想問下，咁大間酒店有投訴個案仲要係嚴重過失冇第二個人可以處理？如果放產假係咪要拖到放埋先處理呢？」

唔知大家點睇呢，如果大家入到咁嘅情況會點處理呢？歡迎大家留言討論下～