SNK 拳皇 早已滲透祖國 10大中國角色個個勁
text-Nam photo-網上圖片
10大中國角色個個勁 最後一個竟然係……？
SNK專出格鬥game，《 拳皇 》就係隻「SNK大亂鬥」遊戲，自從《拳皇95》開始有隊伍制後，令年年有嘅中國隊，自然都有唔少其他SNK遊戲入面出現嘅中國角色，加上自從SNK轉型變成SNK Playmore後，《 拳皇 》故事愈來愈多韓國同中國元素（河北飛賊門），所以講SNK中國角色，數《 拳皇 》嘅角色都飽。當中除咗中國隊「吉祥物」超能力少女麻宮雅典娜其實係日本人外，鎮元齋、椎拳崇、包都係中國籍，亦有啲扮中國人嘅西人，即睇。
鎮元齋
擅用中國拳法，主要係醉拳，係中國隊所有角色嘅師父，亦係《拳皇》入面年齡最大嘅角色。話說中國隊其實亦係超能力隊（可能想食番特異功能個feel），但只有鎮元齋唔識超能力。
椎拳崇
同麻宮雅典娜近乎係官配設定，但兩個人唔係情侶，純粹佢一廂情願，念念不忘當兵十幾年。根據SNK設定，因為雅典娜太過受歡迎搶盡風頭，所以亦有刻意令椎拳崇變成少年偶像，有好嘅外貌同個性，吸引女fans。
包
《拳皇99》中國隊新角色，同樣係鎮元齋徒弟。比起拳崇同雅典娜有更強嘅超能力，喻為「大凶之子」，故事入面成功用盡超能力阻止衛星掉落地球，亦係唯一喺勝利後會講中文嘅角色。
李香緋
《拳皇99》女格鬥家隊成員，睇落似中國人，亦都用中國拳法，不過錯晒，佢係美國出世嘅美國籍華僑，客觀講絕對係美國人，更同李香琴冇任何親戚關係。
麟
《拳皇2000》登場，中國河北飛賊門四天王之一，實力驚人，故事中要主角隊3人合力先可制服佢。帶出咗河北飛賊門呢個設定，其後《拳皇：極限衝擊》入面唔少角色都嚟自呢度，不過人氣麻麻費事講。
墮瓏
《拳皇2003》開始新故事，唔計主角Ash估計係法國人，主角隊成員全部都係中國籍。墮瓏就係河北飛賊門成員之一。唔使問，佢係男人嚟。
神武
另一新主角隊成員神武，上海最強打交高手，除咗擅長打交之外，其他冇乜特別，雖然係主角隊，但同佢個名一樣，喺故事入面都係有路人嘅感覺…
牙刀
由《餓狼傳說》跳入《拳皇2003》，同山崎龍二同比利組成新餓狼隊，雖然全身都似中國人亦係用八極拳，但估計其實係日本人。
紫苑
《拳皇》末期為數唔多嘅中國角色之一，出現喺《拳皇XI》一班大佬之中，個名同個樣都係女人，但又係男人嚟，玩家可以打得放心。
唐福祿
最後一個就係佢啦，有請唐福祿！咪睇佢咁平凡，只出現過喺《餓狼傳說》，八極聖拳中國武術宗師，最大印象位就係好似龜仙人咁識變大隻佬。佢重係「餓狼」主角Terry同反派傑斯嘅師父，地位應該係最高，一齊爆肌啦喂。
https://www.youtube.com/watch?v=78sjrMPCTM4
內容延讀：
>睇完《拳皇》要睇埋《街霸5》
>詳細分析重有Marvel Civil War兩大陣營大對比
拳拳到肉 拳皇96
SNK隻隻遊戲都可獨當一面，當中最受歡迎必數《拳皇》。《拳皇》最與別不同嘅地方，係首隻依遊戲故事發展，而每年都會推出新作嘅格鬥game。首作《拳皇94》仍不成熟，但就首創3人組隊概念，雖仍未能自由選擇隊員，已經好破格。真正響朵要數《拳皇95》，無論係反派八神庵極度MK嘅造型、森氣樓嘅海報、自由組合隊員、引入三部曲劇情、開始發展連續技概念等等，《拳皇95》喺當年都係代表到格鬥game進入新里程，唔再係《街霸》式鬥波鬥昇，引人入勝嘅劇情更影響埋之後嘅《拳皇96》、《拳皇97》都成為經典，特別係《拳皇96》索性將主角招式完全改變，亦係絕少有嘅做法，大蛇、上古三神器等日本神話，相信唔少人係玩《拳皇》而認識。由《拳皇95》至《拳皇98》，都係《拳皇》高峰期，誇張程度，係連帶授權推出嘅同名港漫，亦成一代MK仔集體回憶。當年每星期出嘅《拳皇》港漫都係件大事，我嗰陣都有蒲旺角書報攤等《拳皇》到書，皆因怕買唔到「八神大蛇的血特別版」同「七色鬥氣特別版」，Well！，係MK，所謂人人都有過去……
邊個叫森氣樓？
講SNK唔講森氣樓（Toshiaki Mori），即係講《FF》唔講天野喜孝一樣咁無知。全盛時期森氣樓基本包晒所有SNK遊戲嘅海報插圖，除咗《KOF》、《侍魂》、《餓狼傳說》等格game大作之外，連《Metal Slug》呢類非格鬥game都係佢經手，簡單講，你講得出嘅SNK遊戲其實都係佢畫插圖。直到2000年左右，SNK開始頂唔順並有倒閉跡象，森氣樓亦順理成章由SNK跳到去「宿敵」Capcom成為佢哋專屬畫師，亦開始少咗SNK時期咁個人色彩。值得一提嘅係，佢同負責《Street Fighter》畫師嘅西村絹（西村キヌ），曾聯手繪畫遊戲《Capcom VS SNK》嘅角色，剩係靠兩位畫師嘅名氣已足令此作列為神級。
內容延讀：
>睇完《拳皇》要睇埋《街霸5》
>詳細分析重有Marvel Civil War兩大陣營大對比
《拳皇》當然係勁，但SNK其實唔止《拳皇》，即刻睇埋其他勁嘢！
《侍魂》
以日本武士做背景，節奏奇怪但又十分獨特，出色嘅故事、角色及美術設定為呢隻遊戲打下極好基礎，霸王丸、橘右京、服部半藏、娜可露露、天草四郎、壬無月斬紅郎等全部深入民心，日本嘅受歡迎程度唔比《拳皇》輸蝕，後期連RPG都出過。
《餓狼傳說》
當年唯一同《街霸》有得fight就係《餓狼傳說》，連張學友都要唱佢，可以話響朵作，格鬥game嚟講，有兩上下條戰線亦係佢創，細細玩佢係為咗睇不知火舞，大個咗發現最後大佬傑斯大人先係真正出色嘅男人，後來《餓狼》索性用埋佢個仔做主角，人氣勁高。
《龍虎之拳》
創下多個紀錄，包括首隻容量100MB、有Zoom in/out、有超必殺技系統嘅遊戲，當年廣為人知嘅原因，唔止超必「龍虎亂舞」同「霸王翔吼拳」要練過先識出，更因角色會喺對打時改變形象，例如你會被人打到變豬頭，你用絕招打低對手就會令對手「爆衫」─ 男。女。都。會。爆。
《Metal Slug》
呢隻未玩過都睇人玩過啦喂？不過如果你死都要叫呢隻做《越南大戰》我就真係會笑你。呢隻講多無謂，總之難玩但好正，係咪咁講？
《戰國傳承》
其他唔講，《戰國傳承3》真正係一坐低就唔會起身嘅動作game，非常難玩，但又好好玩，特別雙打嗰陣。我就最鍾意用單眼仔主角，你呢？
SNK點解會玩完？
SNK既然咁勁，點解又會搞到今時今日咁嘅局面？一切要由PS開始講起。就好似今時今日個個話傳媒唔轉做網絡會被淘汰一樣，當年SNK明明呈現良好嘅運營狀況，但眼見遊戲市場因PS誕生而強推3D遊戲，《鐵拳》、《Virtua Fighter》呢類「3D格鬥」類型獲得市場高度關注，連宿敵Capcom都推出3D格game《街霸EX》，市場一致認為「唔轉做3D必定會死」，因此97年SNK開始淆底怕市場會淘汰自己，於是投入大量資金，開發新嘅3D街機底板Hyper Neogeo 64，正式為SNK嘅失敗結局埋下伏線。首作《侍魂3D》、續作《侍魂 阿斯拉斬魔傳》以及3D版《餓狼傳說》同樣劣評如潮，遊戲水準直達垃圾級別，令Hyper Neogeo 64嘅巨額投資血本無歸，2000年SNK已虧損近400億日圓，對一間遊戲開發公司嚟講已經係回天乏術，因盲目跟隨市場動向完全放棄自家拿手把戲嘅結果，就係正式一鋪清袋。睇番近年玩8-bit懷舊feel嘅game長出長有，真係覺得好諷刺。
有沒有關於香港的有趣盤點？
香港地從來不乏心靈熱點，香港不少地方均設立行刑場，正正是大部分屋邨興建時的前身，盤點香港猛鬼屋邨 ，信不信由你！不少朋友都喜歡想當年，香港懷舊小食 及這10款最愛夾糖是不少人的共同回憶，沒有高檔的食材，卻塑造出最難忘的味道。提到昔日蒲點，旺角絕對係大家留低最多腳毛嘅地方，千禧年代必去蒲點 ，你又去過幾多個呢？
有甚麼必學生活小智慧？
天氣時熱時凍，容易令人患上小感冒，唔想次次依靠藥物？可以試試這8招必學鼻塞穴位方法及7大喉嚨痛舒緩方法。除了感冒外，生痱滋亦非常影響日常生活，坊間有各式各樣的解決痱滋方法，助你解決痛楚！
[…] >SNK 拳皇 早已滲透祖國 10大中國角色個個勁 […]