7 more things…Apple果迷必讀！WWDC 2015懶人包

text – Nam

1）Apple Pay先攻英國
Apple Pay喺美國生根後，下個目標就係英國，70%可以碌卡嘅鋪頭同交通服務都已成為佢哋對象。同時iOS 9個Apple Pay App亦會支援更多折扣優惠同VIP卡記錄，「Passbook」亦會改名做「Wallet」。如果香港都用到就肯定大件事。

2）Notes終於可以畫圖
iOS 9唔知點解重點加強咗「備忘錄（Notes）」功能，以往只能打字，而家可以畫埋畫，甚至加入Safari同Maps嘅資料入去，可以即刻圈住某啲位再send俾人。

3）新App「News」睇新聞
iOS 9會新增News feed App並且就叫「News」，佢會集合大量online新聞俾你一次過睇晒。呢類App新聞來源嘅選擇多與少係關鍵，即係如果有《New Monday》啲feed，個App咪用得過囉咁。（但初期只喺美國、澳洲及英國地區推出）

內容延讀：

>髮型懶人包！堅2分鐘唔使擸到畢彼特咁型

>玩Apple Watch米奇表要有！堅靚Vans × Disney米老鼠系列

4）諗定新密碼
因為Apple不時爆出有安全問題，所以要更進一步加強安全性，其他唔講，總之iOS 9會由4位密碼加到去6位，諗定改乜啦喂。

5）CarPlay唔駛線
你未必有車，就算有都未必有CarPlay功能，不過我就覺得呢樣嘢遲早都係車主必備。iOS 9個CarPlay甚至唔駛用線，無線連接就可以用到，本來必備嘅Hifi、藍牙耳機等好快就可以用1部iPhone搞掂～

6）iPad全面升級
iOS 9 for iPad稱得上大幅強化。唔止可以用到Multi-Task功能，可以同時喺畫面開2個Apps做到真正多工，甚至能夠一邊睇片一邊開其他Apps做嘢。如果你係iPad Air 2用家，甚至獨家有個Split view功能，可以喺操作緊一個Apps嘅時候，靠「右拉」手勢打開另一個新App。講落複離，睇圖最實際。但留意，以上功能只支援iPad Air或以上型號，及iPad mini 2或以上嘅型號，即係話得幾部機支援…

7）轉會唔難！撳個掣Apple歡迎你～
身邊一定有朋友係科技白痴，但唔好、亦唔需要笑，因為科技之偉大，就係理應幫助唔同人都可以變得更智能，將唔識電腦嘅人都拒諸門外稱不上好嘅科技。講到咁大，其實都係想講：Apple將會出一個叫「Move to iOS」嘅App，可以無線將Android資料轉移到iOS上，包括聯絡人、訊息記錄、相片、影片甚至Apps，點解咁勁嘅？點做架？？好打耳呀！！其實撳個掣得架啦阿姐，自己搞掂啦。

內容延讀：

>髮型懶人包！堅2分鐘唔使擸到畢彼特咁型

>玩Apple Watch米奇表要有！堅靚Vans × Disney米老鼠系列

1）終於轉到表面嘞！Watch Faces新追加～
隻表用咁耐大家係咪重用緊「米奇」表面？我自己就跟潮人清永浩文用「簡約」，不過嚟緊Watch Faces將會追加2個新選擇俾大家，一個係由自己相簿揀，另一個係顯示某個地方嘅動畫。其實都靚嘅，有好過冇囉～

2）Watch Faces用埋其他App
又係另一應該要有嘅嘢，Watch Faces上嘅資訊終於唔再集中喺Apple原生App，而會進一步開放支援其他App，例如行事曆、工作清單等都唔駛用返Apple，方便好多（老實講有幾多人會用Apple行事曆？）。

3）Nightstand模式唔用嗰陣都有用？
平時夜晚叉電，隻表好正常就冇用架嘞，點知Apple又話新增Nightstand模式，當隻表充緊電時就會變成時鐘，重有響鬧功能，撳吓粒Digital Crown就會撳熄，諗落好似幾有用，但好多人都習慣用電話做鬧鐘，而且咁樣一搞，好多表架周邊分分鐘未出即廢武功（8成表架設計都唔for打側擺）……

4）大多你一頁「朋友」
只有互相加入做「朋友」，先可以將心跳、圖案send俾對方，但唔知點解，而家最多只有12個「朋友」名額，真係唔多夠玩，不過嚟緊就會有多頁選擇，而且唔駛再喺電話加入「朋友」，直接喺隻表度搞就得。

5）活動記錄兼容其他運動App
作為Apple Watch最強功能之一嘅活動記錄（Activity）功能，一直都係獨家村，搞到我哋呢啲用開Nike+、miCoach嘅人都要由頭玩過，慶幸嚟緊Apple終於將活動記錄兼容其他運動App，真係要跳起yeah～

內容延讀：

>髮型懶人包！堅2分鐘唔使擸到畢彼特咁型

>玩Apple Watch米奇表要有！堅靚Vans × Disney米老鼠系列

1）用Mac打機不是夢？Metal技術10倍升級讓
用Mac打機不是夢，El Capitan會加入一個名為「Metal」嘅技術，佢可以改善GPU嘅資源分配，令遊戲表現會有50%提升、運算效率40%提升，呢個技術同樣可以應用喺一般使用上，所以日後開App、UI操作都會明顯感覺變順，係就好啦～

2）Mac機多視窗
本來Mac嘅手勢操作已經好屈機，「El Capitan」終於肯加入多視窗功能，新版Mission Control會睇晒所有運作中嘅視窗，配合Split Windows功能重可以將兩個App同時縮喺相同畫面，對我呢類寫稿佬嚟講實在太方便。

3）全新中文字體
唔知你點諗，我就覺得呢個先係最重要。新增嘅字體叫「蘋方」，將會取代現有中文字體，官方稱會解決Retina熒幕下令中文字較難讀嘅問題。我唯一挑剔係個字體名，well……

真正1 More Thing～Apple Music串流音樂網站！
話係神秘又唔神秘，估都估到嘅Apple自家音樂串流平台「Apple Music」，即將6月30日就會正式推出！呢個收購Beats背後嘅真正動機，蘊釀咁耐終於成事，不過唔見有什麼超正功能，唯一特別係有個人手選曲嘅「Beats 1」網絡電台，24小時全天候開播，至於另一重點「Connect」，其實係俾歌手發布消息同生活片段嘅平台，不過亦唔係新鮮功能。點都好，呢個會上放喺壓軸登場嘅「One More Thing」點都有啲吸引力，收費方面係首3個月免費，US9.99月費，不付費只能用Beats 1及Connect，到時將可以用iOS 8.4以上嘅iDevice或桌面版iTunes收聽，更出奇地會有埋Android版本（秋季推出），全平台殺晒，到時點都要試。

內容延讀：

>髮型懶人包！堅2分鐘唔使擸到畢彼特咁型

>玩Apple Watch米奇表要有！堅靚Vans × Disney米老鼠系列