直擊東京遊戲展 5隻諗唔到理由唔玩嘅中文勁game

text-Nam photo-Nam、網上圖片

PS4減價賣$2,780

未睇games之前先嚟單喜訊，PS4即將於10月1日開始，由現價$3,380減至$2,780，規格及機能不變，同時將推出7隻新顏色嘅HDD保護蓋、4色DUALSHOCK 4同3色PS Vita。即係點？即係啱晒好色嘅潮人同玩家囉，你重想點呀？

死性不改？10個iPhone 6s跪求改進PK位

5隻中文必玩新作！隻隻勁料

1.回到原點 《人中之龍 極》

10年前《人中之龍》喺PS2推出，從此成為SEGA王牌遊戲之一。發布會上由製作人名越稔洋親自宣布，即將會為《人中之龍》進行高清Remastered，並改名為《人中之龍 極》。名越大佬重講晒sorry話當年隻game其實真係麻麻地，自己睇番都有啲唔好意思，所以呢隻《人中之龍 極》唔止會係畫面強化咁簡單，直情會加入大量新劇情同小遊戲，絕對係當新game咁做，最快2016年1月21日推出，堅要買。

內容延讀：

>不要玩食物？日本妹玩到上晒身添！

>記者嚇破膽率先試 哈囉喂 × 《THE WALKING DEAD》5大場景有幾迫真

2.買PSV最大理由 《Gundam Extreme Versus-Force》

當見到PSV有新色，好事之徒第一個諗法就係「咁又點呀？」明喎！對手3DS真係贏成條街，不過咪住先，冇人話PSV嚟緊會放軟手腳，超勁作《Gundam Extreme Versus-Force》偏偏唔揀喺PS4而揀咗喺PSV推出，各位機師要打到天昏地暗就要買PSV啦。今年冬季就會推出，重有埋中文版，不過有冇中文版都得啦，呢隻咁勁。

3.首次中文語音 《三國志13》

《三國志13》終於都有啦！作為系列30週年紀念作，開發商KOEI話今次會以「群像劇（Human Drama）」、「壯闊（Spectacle）」同「張力（Dynamism）」3 大概念為主題，然後…就係得咁多。但你話我偏心都係咁話，見到「三國志」三個字都唔使諗原因，基本已係終極必玩之作，暫時睇片應該冇上集咁伏，加上呢類game賣少見少，唔俾多次機會佢哋都唔得。值得留意今集會係首次有全普通話語音嘅一集，不過我一定會開番日文，唔係點聽張飛講「敵將，吾去脫他衣！」呀！PS4版12月10日推出。

4.又有PSV 《勇者鬥惡龍 英雄集結 II 雙子之王與預言的終結》

數去年Square Enix最強遊戲，我心目中只有呢隻《勇者鬥惡龍 英雄集結》（簡稱DQ無雙），如今續作《勇者鬥惡龍 英雄集結 II 雙子之王與預言的終結》已肯定推出，今次重會有埋PSV版，實在可喜可賀。暫時又係乜都未知，諗番上集男、女主角，有上緊位嘅兩大人氣明星松坂桃李同桐谷美玲配音，今集會有新人定用番兩位配呢？用新人嘅話，福士蒼汰同橋本環奈都唔錯呀！日文版先喺2016年春季推出，中文版就2016年暫定，而且要留意中文版只有PS4同PSV（冇PS3版本）。

5.那一天人類記起了要殺巨人 《進擊的巨人》

壓軸登場仍然係超強作品，全球銷量超過5千萬套嘅《進擊的巨人》，等到而家終於先有隻似樣嘅game。呢隻同名game同樣係由負責《三國無雙》嘅ω-Force開發，由預告睇到佢似「無雙」得嚟同樣有巨人狩獵作戰，可以見到主角艾倫利用立體機動裝置由地下飛到半空，並且喺半空再轉變一次飛行路線，繞到巨人後面進行攻擊。睇落非常非常之爽，加上ω-Force對動作、打擊感掌握非常之好，有十分一fans會買game已經係隻5百萬銷量嘅大作，務必留意。同時會有PS4、PS3同PSV版本，但仍未知推出日期。

內容延讀：

>不要玩食物？日本妹玩到上晒身添！

>記者嚇破膽率先試 哈囉喂 × 《THE WALKING DEAD》5大場景有幾迫真