高達打EVA 手電版 機械人大戰 免費玩

睇番隻App叫《超級機械人大戰X-Ω》，又X又Ω勁難讀，全新作品暫時有《ZEGAPAIN》同《STAR DRIVER閃亮的塔科特》兩套，長青樹如《機動戰士GUNDAM馬沙之反擊》、《新世紀福音戰士》、《鐵甲萬能俠》、《超獸機神斷空我》、《超力電磁俠》、《飛越巔峰GunBuster》等等都齊，暫時總數有28部作品嘅機體登場，不過未有啱啱嚟咗香港嗰隻Wing GUNDAM囉！

text-Nam photo-網上圖片

課金無極限
玩法類似《植物大戰喪屍》同《Chain Chronicle》，敵人由左邊進攻，玩家就喺右邊防守，好似「守城game」咁嘅玩法，不過有4條戰線，出絕招有cut-in大頭加對白亦係常識。另外，亦睇到駕駛員有機械人大戰 傳統嘅「精神」指令，睇片已經勁熱血！不過，課金game=登場作品無限擴充=無底洞=賣血都唔掂，邊有錢呀你老＿！

內容延讀：

>法國神人自製3D動畫向宮崎駿致敬

>順手睇埋全球最大Unicorn Gundam獨角獸高達組裝過程

日本地區限定SR主角機
留意番，隻App都係日本地區限定，到時iPhone友轉番地區做「日本」先download到（Android友到時搵APK啦唔使我教），另外而家做緊事前登陸，完成後會攞到原創主角機「ヴァンアイン/ヴァクス・トゥーム」，但登記BANDAI NAMCO ID時，記得將地區轉番「日本」，否則無法完成登陸。（http://srw-x.suparobo.jp）

機戰初回憶 Game Boy
初代 機械人大戰 由1991年推出，平台係得黑白色嘅Game Boy，雖然當年只有3部作品，包括鐵甲萬能俠、三一萬能俠同高達，但一出已經好勁，亦令遊戲開發公司Banpresto（俗稱「眼鏡廠」）聲名大噪，而呢3部作品更成為機械人大戰 「御三家」（有Big Three嘅意思），所有系列作呢3部作品都係鐵膽，三缺一嘅話都好影響銷量同口碑。曾幾何時，機械人大戰 出新作係件遊戲界大事，個個都期待會加啲乜嘢新機械人入去，最經典要數超任嘅《第3次超級機械人大戰》同《第4次超級機械人大戰》，分開上下集出嘅《超級機械人大戰F》亦係個人心水。直到06年BANDAI NAMCO全面收購Banpresto後，機械人大戰 亦成為BANDAI NAMCO招牌之一，但作品開始愈嚟愈亂，連《索斯機械獸》都有，未來隨時有《小露寶》，講真。

內容延讀：

>法國神人自製3D動畫向宮崎駿致敬

>順手睇埋全球最大Unicorn Gundam獨角獸高達組裝過程