【調查報告】港人要買樓先要絕食20.7年！專家：買唔起樓，係因為你哋懶惰！

撰文：Andy｜圖片：《太子太爆太空艙》劇照、滬港經濟發展協會、ViuTV截圖｜編輯：海月

調查報告指港人絕食20.7年先買得起樓

疫情之下本港樓市依然堅挺，有美國顧問公司調查報告顯示，香港樓價連續11年「榮登」全球主要城市中最難負擔，想買樓就難了！該報告收集去年第三季全球樓價和當地家庭收入中位數，報告的統計數據涉及8個主要國家，合共92個住宅市場。統計結果顯示本港供樓佔入息比例按季微跌至20.7倍，但仍遠高於以13倍排第2位的加拿大溫哥華，以及第三位的澳洲悉尼。

小編講段嘢翻譯轉成人話：大家香港人要買樓，普遍要絕食20.7年先買得起個單位。

溫馨提示，該份報告嘅結論貌似冇計算到通脹，如果計算通脹，想買樓絕對唔只20.7年。

樓市專家蔡志忠指責港人懶惰才買不起樓

不過本港樓市專家卻認為香港人買唔起樓係因為香港人懶惰！稱香港樓仲便宜過深圳。

樓市專家蔡志忠接受訪問時表示：

雖然因疫情而失業率高企，但中小型單位樓價已經好貼地，冇任何下降嘅空間。

蔡志忠又反擊不少市民嘅港樓樓價離地言論，不但不太認同難上車，更認為只係港人唔肯努力：

基本上肯做嘢，兩公婆每人做幾年嘢，每人月賺兩萬蚊唔係難事，屋企又會支持你。

佢更舉例計算稱：

買一層500萬嘅樓，首期50萬元，加埋雜費60萬元，借450萬元，每月供萬幾蚊，點會買唔起樓呀。

香港樓價比深圳便宜論

蔡志忠以將軍澳某大型屋苑，跟深圳核心地段住宅做比較：將軍成交呎價只需要約1.6萬元，而深圳核心地段住宅，以人民幣計算呎價已經超過1萬元。所以結論係：

「基本上可以話係平過深圳。」

相信唔少人同小編一樣，聽完之後都一頭霧水。的確我哋齋睇帳面數字顯示，香港樓係貴啲，不過專家以咁刁鑽角度嘅角度解釋「香港樓價比深圳便宜論」，都的確幾新穎。最後，小編都幫大家稍微整理下蔡志忠警世名言嘅重點：

1）香港住宅以實用面積計算，呎價貴人地兩成

2）人民幣與港幣的匯價又有一成幾差距，加上好多深圳樓本身已有齊裝修

3）租金又比香港樓平一半，供樓利息又高達5厘

結論：香港樓已經平過深圳！

唔知大家睇完美國顧問公司嘅全球報告，又聽完本地專家嘅分析，覺得邊個嘅結論有道理啲，邊個貼地啲呢？