【運動祥】香港都可以係「地獄主場」！

text-運動祥 photo-運動祥（部分網上圖片）

旺角場爆滿再掀紅旗

南華雖因後防失誤導致上半場被對手攻入3球，但作客嘅柔佛 DT 明顯受主場球迷氣勢影響，每次攞波都被球迷噓聲付予壓力，主力球員費古路亞更於比賽早段魯莽犯規而領紅牌被逐，可惜南華球員未能把握主場優勢，最終以1:3（總比數2:4）出局。

「We Are Hong Kong！」

近日香港足球隊嘅表現，重燃好多球迷對本地波熱情，上週主場對卡塔爾負2:3，球隊戰至最後1分鐘仍不言敗嘅表現，令香港足球氣氛推到頂點。

當日打氣嘅聲音完全籠罩住成個旺角場，場面嘅震撼、激動，令人唔敢相信呢度係香港，原來本地波都可以充滿激情，就如「鍾仔」喺電視直播期間所講：「球迷一齊入場嗌『We Are Hong Kong』，係1件幾咁美好嘅事！」

念念不忘09東亞運

近年香港主場一遍紅海最威水嘅，一定係2009年東亞運動會決賽。當年港隊被外界一致睇淡下闖入決賽，迎戰日本。決賽夜大球場坐滿40,000名球迷一遍紅海，全部人嘅心都係支持香港隊，最後港隊亦不負眾望，奇蹟奪冠。同年，南華亦打入亞協盃4強，主場迎戰科威特SC。當日情況亦與東亞運決賽相似，大球場同樣出現一遍紅海。

「地獄主場」需要你入場！

此兩役後全城掀起「本地波熱」，無論電視、報紙、新聞，話題都離唔開香港足球。呢幾場賽事話俾我地知，香港並唔係冇發展足球嘅條件，香港並唔係冇人支持足球，即使面對其他亞洲足球勁旅，香港球隊亦可以喺主場打出氣勢，踢出成績俾人睇！大家不妨一齊走入球場，成為紅海嘅一分子，支持香港足球。

有你，香港都可以係「地獄主場」！
內容延讀：

>【香港人撐香港隊】世界盃外圍賽 香港對卡塔爾永不放棄精神2:3

>【喊出嚟】香港隊0：0賽和中國隊 ＃香港勁揪