連登仔分享打工20年警世心得總結「職場10不做6不要」！

連登仔分享打工20年警世心得總結「職場10不做6不要」！

日前有一名港男連登仔在討論區，分享自己「前前後後打工打咗廿年」打工警世心得，現時工作情況已經處於「唔撈自己攪下副業好唔錯」，並列出職場「職場10不做6不要」規則，第一個「不」就係「唔好同公司發生感情，大家雙方只係互相利用」，有唔少網民回應第一點已經中晒point，說出不少打工仔心聲。

1. 唔好同公司發生感情，大家雙方只係互相利用。

2. 唔好同同事發生感情，大家十成九都只係互相利用。

3. 唔好無償OT咁傻，你要上位係要有足夠時間自我增值，唔係做窮忙族愈做愈窮，如果有經濟需要就做住先唔好諗長做。

4. 唔好留喺同一公司太長時間，除非你做到絕對絕對高層（唔係偽高層 尤其係銀行果啲）先考慮吓做耐少少，打緊風流工就當我冇講過。

5. 唔好乜都say yes，人哋只會愈得寸進尺，當你傻仔咁洗，有一次say no人哋會懷恨在心做死你。

6. 唔好介懷一時失意，冷靜面對努力改善總有出頭。

7. 唔好一朝得志就語無倫次，好易過身。

8. 唔好出盡風頭懶醒，自己工作範圍內就做，範圍外話知你死。

9. 唔好扯開自己真面目，四兩撥千斤好過惡言相向，職場唔需要傷感情。

10. 唔好讀埋啲冇謂課程，實戰經驗好過讀啲垃圾野多多聲，如果係行內必需就當我冇講過。

網民爭相回應：「打工要好似come on james港女嘅心態，唔好浪費自己嘅時間同青春喺啲垃圾工度，見唔對路 / 加人工加得慢就要諗轉工」，亦有網民和應：「1-5中哂，遞咗信之後先知所有同事都係載住面具做嘢懶fd，浪費咗我成年心機同時間」、「都好同意，公司99%都無感情可言，同事就95%啦」。

連登｜「職場10不做6不要」助新入職員工

亦有持平網民表示：「有得分先會落多少少力做 冇得分嘅hea吓hea吓又一日」、「唔好做壞人 亦都唔好做好人」，樓主收聽完網民意見後後補「6個不要」，網民認為此「警世文章」有助初入社會的打工仔，大家又覺得如何？

11. 唔好做startup/港資/要求員工奴性重/規模太細發展空間有限嘅公司。

12. 唔好亂搞職場男女關係。

13. 唔好長做架構混亂人事複雜是非小圈子過多嘅公司。

14. 唔好避忌interview，你會從中收集到好多你本身圈子內唔知嘅情報，而呢啲情報或多或少會對你對行頭/人事/公司style/等等了解加深，至於行頭窄唔窄而增減interview次數就自己調節。

15. 唔好忽略每間公司嘅潛規則，好似《寒戰》梁家輝話齋：識係條線入面玩都係職場生存技能，當然如果潛規則係要你無償ot/發揮奴性/講求擦鞋/等等就真係你做埋我果份，間公司好打有限。

16. 唔好覺得返工係理所當然而放棄自己興趣初心，因為返工係違反人性，興趣初心係合乎人性，你順勢而為一路堅持(工餘時間)會有意想不到嘅效果，不論金錢上/成就上/心理健康上，而且呢個dynamic又政治化嘅時勢工字一定冇出頭，亦冇話份工保你一世無憂 專業人士都咁話。