【編輯部嚴選！】《 足球小將 》明星隊最佳11人

其實近年唔少日本足球員已經喺歐洲落班，當中效力德甲史浩克04嘅內田篤人，因為攻守兼備，而且技術上成，被日本人視為「真人版麥泰萊」，就連《 足球小將 》原作者高橋陽一都話內田篤人係現實中外型同氣質最接近麥泰萊嘅球員！

咁啱《 足球小將 》面世35週年，高橋陽一就搵嚟內田篤人，將佢crossover戴志偉，一齊使出「雙人衝力射球」，連戴喺上星期四日本出版嘅特刊《Number PLUS體育漫畫最強論》中，特刊封面完美重現雙人射門嘅場面，所有漫畫迷同足球迷睇到一齊尖叫！

慶祝35週年點止咁少搞作，出版社重訪問咗多位現役同退役足球名將，選出佢哋心目中「《 足球小將 》中最佳11人」，基本上戴志偉一定入選，不過其他位置上都唔同。巴然係咁，《New Monday》亦都趁熱鬧，選出「《 足球小將 》中最佳11人」，你心目中係邊幾個？

text – Oscar

內田篤人話《足球小將》喺歐洲一樣咁受歡迎，唔少外國隊友都叫佢做「Tsubasa」，即戴志偉嘅日文名讀音，人氣超強！

 
內容延讀：

＞去東京前必睇！杜如風《東京攻略》11大搵食懶人包

＞明早有叉用！早啲衝去換麥當勞迷你兵團 餐具

《Number PLUS體育漫畫最強論》搵嚟一班J-legue球員同教練如佐藤壽人、玉田圭司、名波浩等揀佢哋心目中嘅《足球小將》最佳11人，分析專業，但驚喜就無乜，好似戴志偉、泰萊、林源三、三杉淳都係「穏胆」，不過都係嘅呢4個都唔揀，真係唔知揀邊個！

我哋《New Monday》編輯部又趁熱鬧，選出我哋心目中嘅最佳11人。嗱嗱嗱，除咗上面講嗰4個穏胆，其他位置我哋編輯部都拗到面紅耳熱，幾乎連同事都無得做！最後得出以下嘅結果，唔知又係咪你心水？

守門員

林源三
要喺林源三同健威之中選擇確實太難，因為2個都係實力超班嘅守門員，不過最後揀咗林源三，因為保全叔曾經配過音，感情分贏晒！

後衛

樑仔
唔好以為樑仔淨係識「顏面擋球」，其實佢係絕大部份球員嘅寫照：冇乜先天天份，但經過後天努力，終於可以進身國家隊。佢未必係最好波，但一定係其中1個最努力嘅球員。

三杉淳
能夠克服心藏毛病再戰綠茵草場，三杉淳已經非常厲志，加上球技了得同俊朗外型，會唔會太過完美？

阿爾拔圖
巴西嘅首席後衛，防守同指揮堪稱世界第強，曾經令到日本隊陷於苦戰。

奧瑞蘭
正所謂「弱旅出龍門」，不過被視為「魚腩」嘅沙地阿拉伯竟然出咗個「亞洲最強指揮官」奧瑞蘭，令三杉淳都話要跟佢學習！

 
內容延讀：

＞去東京前必睇！杜如風《東京攻略》11大搵食懶人包

＞明早有叉用！早啲衝去換麥當勞迷你兵團餐具

中場

麥泰萊
被喻為「球場藝術家」嘅麥泰萊，秀麗嘅腳法但無私嘅精神，明明可以成為主角，但甘願默默為戴志偉助攻，係大家心目足球場中嘅夢幻隊友！

利華爾
參照前巴西球星利華度創作嘅角色，停、傳、帶、射都係世界級，係戴志偉喺巴塞隆拿嘅最佳拍檔，不過漫畫版就冇講佢有冇「演技」。

拿度尼
戴志偉最強對手之一，由國家隊到球會都係鬥得難分難解，可惜呢位巴西中場最後都係輸咗。

戴志偉
故事嘅主角一定係最勁，唔單止足球天份高，而且球場上嘅領導能力亦強，每個球隊最希望擁有嘅球員no.1！

前鋒

小志強
球場上嘅小霸王，其「猛虎射球」力量之強連世界級龍門都未必頂得住。不過作為教練會有啲擔心放佢落場等於踢少個，因為球例唔俾球員摺袖或着無袖波衫，即係話小志強未出到「猛虎射球」先紅牌出場……

史奈達
唔係荷蘭中場，而係講緊以德國名將路明尼加為藍本嘅德國前鋒史奈達，其射術精湛係漫畫世界第1，而且多次射破李源三嘅十指關！

 
內容延讀：

＞去東京前必睇！杜如風《東京攻略》11大搵食懶人包

＞明早有叉用！早啲衝去換麥當勞迷你兵團 餐具