【藍橘子】《約極都約唔成嘅飯局，原來時間真係沖淡一切，包括友情》

我深深嘆咗一口氣，好有衝動打一句「不如算數，以後唔好再約。」

幾日前，有人問：「香港前排開咗海底撈，有冇興趣？」
　
本來個個都話好，話呢間火鍋想試好耐，終於喺香港開一間，亦有人話最鍾意食辣。
　
結果到約日期時間，就無晒蹤影，個個都已讀不回。
　
以前學生得幾十蚊零用錢，用咗嚟食飯無錢去網吧，肚餓無錢唯有拎同學嘅飯盒Share。雖然無錢，但每星期六、日，都會一大班朋友出嚟Hea。
　
就算身上一蚊雞都無，得返來回嘅車費…都一定要出嚟！無錢出嚟做乜？其實無嘢做，喺麥記吹水，覺得同朋友一齊已經好開心。

 
相反人大咗，無錢就乜都唔想做。
 
以前就算走堂、詐病、無錢、欠交功課都要同朋友出去玩。而家會詐病、扮忙、呻窮…只係為咗拒絕朋友約食飯。
　
唔知幾時開始，到底發生過咩事，令朋友關係開始疏遠？原來時間，真係可以沖淡一切，包括友誼。
明明畢業時約定，無論將來係點，大家嘅友誼都唔會變。
但出嚟做嘢幾年後，你開始驚訝自己竟然會有咁大轉變。

每次難得地約得成飯局，大家都將「現時嘅自己」收收埋埋，唔敢講自己升職，唔敢講自己薪金。
　
話題只係剩返中學時嘅回憶，講其他話題變得尷尬，明明以前用幾惡毒嘅語言互串，都唔會覺得有問題。因為你知道，朋友唔會嬲，互串先係最開心嘅溝通。

當你入去朋友嘅臉書，發現每個人都有自己生活圈子，有新嘅朋友圈。自己由最親密嘅朋友，漸漸變成「中學同學」。
　
到最後，我都無喺飯局Group，send嗰句決絕嘅訊息。
因為我唔敢…我寧願擺個Group喺度吊命，都唔想無咗呢份友情…
　
亦有可能，失去中學嘅友誼，只得我一個覺得可惜。
 

內容延讀：
【藍橘子】《無用emoji，女朋友話我態度差》
>>>LIKE我們fb<<<
fb.com/newmonday.com.hk