【藍橘子】《過完年，係清潔工人嘅惡夢！》

新年對好多人嚟講都係喜慶節日。大人打麻雀、行花市、睇煙花（今年無），細路又有得逗利是（如果無被父母沒收的話）。
但係對某啲人嚟講，新年係一個惡夢。例如…負責清潔街道嘅清潔工人。
每年新年，垃圾堆填區都會收到好多「慶節禮物」。大家可以細想一下，新年製造咗幾多垃圾？

拜年送禮要用花紙，花紙拆完就丟，新年禮品嘅曲奇、餅乾、糖果、瓜子食唔晒又丟。
利是封，每年銀行都一定派一大疊畀你，但好多人都鍾意自己買，結果啲利是封擺到過完年又丟。
當然啦，拆完利是唔通仲留住個利是封咩，你在意嘅只係裡面嘅錢。於是，又為地球製造多一件垃圾。

可能你會覺得，一年一次嘅喜慶節日，無需要計較咁多，至多平時環保啲，唔通送禮唔用花紙包裝咩！

但係，每年逼到可以水洩不通嘅年宵，好多人就算唔買花都會入去行個大運。
不過，年宵過後永遠都留低一大堆垃圾，除咗戳完魚蛋嘅器皿，仲有好多賣唔完嘅花、精品、氣球…

因為香港寸金尺土，將貨品丟棄嘅成本，比起租貨倉儲存更加平，對好多大學生嚟講，年宵係一個圓創業夢嘅地方。
當佢哋新年後再經過年宵場地，又變回一個清潔嘅足球場。但辛苦清潔工人，通宵喺場地打掃，收拾賣完即棄嘅商品。
最後想講，真係唔好再畀小朋友玩「撈金魚」喇！（香港食環署已禁止，但仍有地方可以玩）
小金魚完全唔值錢，所以攤販只當金魚係商品。
因為養活金魚係成本，所以好多攤販都唔會放氧氣、餵魚糧、換水，小金魚餓死就直接換另一批。

家長應該藉呢個機會教識小朋友愛惜生命，而唔係「畀佢玩吓，反正小朋友唔識呢啲嘢」
人類的喜慶日子，往往都係環境嘅受難日。很多人覺得因為一年一次沒所謂，呢幾日清潔工有雙倍薪水！辛苦啲都好應該啫！
或者，「一年一次」這個詞，只是我們放寬道德意識嘅藉口。至少我唔介意收禮物無花紙，利是封都可以慳番…
 

內容延讀：
【藍橘子】《當老豆視你為男人咁去傾偈，代表你真的長大了》
>>>LIKE我們fb<<<
fb.com/newmonday.com.hk