【藍橘子】如果呢個世界上有「老豆老母傳心師」就好了

部分內容由博客提供及授權轉載，不代表本刊立場！

如果呢個世界上真係有「動物傳心師」，人類可以同動物溝通。
我都好想有一個「老豆老母傳心師」，可以畀我知道屋企人諗乜，可以順利表達心意地溝通…

以前細細個，連返學去過幾多次廁所都會同屋企人講。
唔知由幾時開始，總覺得父母好囉嗦，每同佢哋講一句，就會還返十句意見畀我。

到我畢業出嚟做嘢，同父母傾計嘅時間就愈來愈少。
每次嘅交談內容，總係圍繞住幾樣嘢…

「賺咁多錢，幾時畀多啲家用？」
「淨係識得駁嘴，點解你咁不孝，小心畀雷劈！」
「我養你咁多年，你就要有責任養返我。」

有頭毛邊個想做癩瘌，試問有邊個想做不孝子？

我都好想做一個孝順仔啊，但我成日都覺得，如果我盲目順從，將自己心底裡嘅意見屈喺心入面，
扮演一個乖乖仔…

唔通呢種真係「孝順」咩？
正因為佢哋係我父母，我更想將心入面嗰句講出嚟，我希望要一個平等討論，而唔係用父母身份壓制…

每日放工返到屋企，就會急急腳走入房，連眼神接觸都覺得尷尬。

即使係同一張枱食飯，父母望住電視，我望住部ipad。我睇美劇，佢哋睇tvb，連娛樂話題都唔一樣。

仲有一樣禁忌相信大家都知道，就係千祈唔好同父母討論政治！當父母睇住新聞，見到班示威者被
警察毆打，而拍手叫好話呢班年輕人「抵死！哈哈！打多幾棍啦！」

父母表達意見，並唔係想你討論，佢哋只想你認同佢。只要你唔認同，你就係唔尊重、唔見慣世面。

如果有一個老豆老母傳心師，可以幫我瞭解父母想法，你話幾好呢？
好似傳心師咁講，改變自己粒子形態，變成一排粒子，父母就即時接收到我嘅想法。

其實我知道，父母係真心對我好，亦好錫我，只係表達方式用錯咗。
我亦好想做一個孝順仔，可以同父母食飯時暢所欲言，而唔係一開口就鬧交…

如果有人仲係覺得「父母生你出嚟咁辛苦養大你！你就有責任要報答父母！唔可以逆佢意！」

我覺得呢種想法好唔尊重「父母」兩個字，因為呢種只係極權統治奴隸嘅手法。

內容延讀：

【藍橘子】《去婚紗展就見識到咩叫神級推銷》

>>> LIKE我們fb <<<
fb.com/newmonday.com.hk