【藍橘子】 《擺酒，係一次愛情、友情、親情的考驗！》

部分內容由博客提供及授權轉載，不代表本刊立場！

結婚，係伴侶兩人一次感情嘅考驗。
擺酒，就一定係新郎新娘嘅朋友，一次友情嘅考驗。
因為通通都係關乎「錢」。

到底應該畀幾多錢人情，已經成為朋友間絕交嘅導火線。
雖然唔可以以金錢衡量一段友情，但你畀得少人情，就證明我同你嘅友情唔足夠…

100蚊、200蚊？我一世人結一次婚，你食一餐韓燒都貴過畀禮金…我仲點同你做朋友啊？

500蚊先啱啱夠回本，800蚊，我以後Facebook會多啲Like你啲相，多啲留言。
1,000蚊，先係真正嘅友情價！

而家擺酒要「回本」愈來愈難，於是好多新婚夫婦都諗盡方法，慳得就慳。近年好流行擺cocktail party，因為平好多，好容易就可以回到本。

但當然，呢類潮流嘢老人家未必喜歡。我有個朋友佢結婚，父母又要大排筵席，又一定要食翅。

朋友講咗句：「你咁多要求，我畀你話晒事，我同老婆會依照你安排日期出席，所有禮金你可以一個人袋晒，但所有擺酒相關一切，由你一手包辦。」

結果，朋友父母就無出過一句反對嘅聲音…

為咗慳到盡，連餅卡都唔想買多。於是，而家好多人都會先用whatsapp 問晒所有朋友，邊個會出席，邊個唔得閒。

正所謂「無功者不留飯餸」一張餅卡都唔可以浪費喺啲唔出席嘅人身上。

而今次主角Amy，亦都一樣先問晒所有朋友會唔會出席婚宴先再決定餅卡數目。

真係唔試過結婚都唔知，Amy問咗幾十個朋友，撞啱有十個去旅行嚟唔到，有五個家中有白事，所以無法出席，仲有八個已讀不回…

呢一刻，Amy對「友情」呢兩個字嘅信任度零到谷底。
呢段期間，Amy受盡各方壓力，佢終於明白點解好多女性舉辦婚禮擺酒會搞到抑鬱症…

為咗發洩心中不忿，擺酒嗰日，Amy搵晒所有去旅行嚟唔到嘅朋友嘅Facebook，睇吓佢哋呢幾日嘅行蹤。

若要人不知，唔好太低B。有幾位朋友已經中招，其中一個貼咗碗譚仔米線寫住Lonely Dinner上Facebook，Amy即時留言：「去到日本做乜唔食拉麵啊？」

另一位話因去旅行無法出席嘅朋友見狀，即時上傳咗一張佢去韓國，一堆戰利品擺晒喺床上面嘅照片，寫住「返到香港要忍口了。」

好可惜，道高一尺魔高一丈，Amy放大張相發現，其中一包薯片係上年嘅期間限定特別版…

一個婚宴，就令到Amy總共同好多個朋友絕交。

佢為咗回本擺cocktail party拎朋友禮金。而一班朋友為咗唔畀禮金而不惜講大話。到底係邊個出賣邊個？我真係搞唔清…

我只係覺得，結婚係人生大事，亦係兩個人嘅事，做所有嘢都應該由兩個人決定，任何人都無權去干涉。

講到錢，永遠都係傷感情。
但可惜呢個社會，任何事都係以錢行先…

而我個仔，只會覺得一班老嘢喺度懷念當年情…

內容延讀：

【藍橘子】同女朋友一齊耐咗，發現連性格都越來越似佢

>>> LIKE我們fb <<<
fb.com/newmonday.com.hk