【藍橘子】《到咗某個年紀，每年都出席 朋友 擺酒》

部分內容由博客提供及授權轉載，不代表本刊立場！
到咗某個年紀，你必須承認自己已經長大成人，係時候要諗諗將來…
因為你發覺到，每年身邊都有朋友結婚，你每幾個月就出席婚宴、滿月酒。

尋晚，我就參加咗中學同學Kelvin嘅婚禮。我同佢近幾年因為工作關係而疏遠，但以前係最親密嘅朋友，所以參加佢嘅婚宴時特別感觸。　

見住以前白白痴痴，講嘢唔經大腦嘅Kelvin，佢哋穿起骨挺西裝，喺台上講出一番動人演說。
替佢哋高興之餘，不禁嘆氣，以為只係無見幾年，Kelvin仲好似以前認識嘅佢無太大分別，但今晚望住台上面嘅佢，點解感覺會咁陌生？

每次參加朋友嘅婚宴，先發現一直無成長過嘅，只係得自己一個…
　

婚宴場上例牌播放新郎新娘成長片段，望住Kelvin中學時嘅照片，每張都有我
喺相入面，兩個白痴攬頭攬頸，直到佢畢業之後，同佢嘅合照只得偶爾飯聚，最後我開始消失喺佢生活圈子入面。

十年前，承諾過無論邊個結婚先，都一定會做對方兄弟。
今日，我只係尷尷尬尬簽個名擺低利是，坐喺台下其中一枱，身邊全部都係唔認識嘅人，一直傻笑感觸替佢高興。

直至Kelvin逐枱敬酒，佢半醉行去我身邊，搭住我膊頭…
「多謝你今晚嚟，好兄弟！」
「梗係啦，我記得㗎，互相去大家婚宴，我頭先真係塞落份風月版當人情畀你㗎！」
「哈哈，好兄弟…」

說畢，佢老婆就向我點一點頭，拉走咗Kelvin 繼續招呼其他賓客。
全晚，Kelvin 都被兄弟圍住通場走，我搵唔到機會開口同佢傾計，因為我哋嘅話題，剩返學校時嘅回憶…

係乜嘢令我哋關係變得疏遠？
係時間…

要維持一段感情，需要雙方付出時間同睇吓有冇心。
唔單止係友情、愛情…就連親情都係一樣。

相信每個人都想做孝順仔女，但當子女長大，有自己一套諗法，有屬於自己嘅人生觀價值觀，但父母唔諒解，用身份將子女壓下去。
你只能被逼遷順，以報答多年養育之恩，否則就要背上不孝之罪名。無人想做不孝子，但孝子口服心不服，算唔算不孝？

一生人會遇上嘅所有人都係過客，
但喺邊個站落車，好多時由你去決定。
部分內容由博客提供及授權轉載，不代表本刊立場！

內容延讀：

【藍橘子】《去婚紗展就見識到咩叫神級推銷》

>>> LIKE我們fb <<<
fb.com/newmonday.com.hk