【藍橘子】《點解旺角班大叔唱得咁難聽都有人圍觀》

最近，有一個喺外國讀書同工作十幾年嘅朋友。趁住假期佢返咗嚟香港，我帶咗佢周圍行街同食嘢。

有一晚我帶佢去旺角，佢一行出地鐵站門口見到而家嘅旺角，朋友當堂皺晒眉，嗰種失望、唔理解、茫然嘅眼神…

「點解旺角會變成咁嘅？」朋友問，仲差啲想喊出嚟。

朋友記憶中嘅旺角，仲係行人專用區被寬頻佬霸佔嘅年代，所有行人都行晒出馬路，反而兩邊行人路無乜人。

因為我讀嘅中學喺旺角附近，每日放學都會行一行旺角，好景、信和、再去網吧打幾粒鐘機先捨得返屋企。

但而家？！尤其係星期六、日，約人去街都寧願揀其他地方。

當朋友見到行人專用區，有堆大叔喺度夾Band，外加幾個大媽跳扭腰舞，朋友當堂抓頭髮幾近崩潰。

「呢班咩人嚟？！」
「佢哋係一群有搖滾精神嘅阿叔大嬸…」
「點解無人趕佢哋走？無噪音管制咩？點解無年輕人？得阿叔鍾意夾Band？」
「唔知…其實呢十幾年，香港發生咗好多事，都無得解釋…」

朋友唔明點解由寬頻佬會進化成一隊又一隊嘅大叔唱歌班，每檔音響鬥大，鬥唱得難聽…

你覺得呢班大叔真係熱愛音樂？有時星期日早少少出旺角，佢哋一早就擺晒音響喺度霸位，但只得
幾個連歌詞都未跟得切嘅阿叔喺度唱Ｋ。

首先我唔評論班大叔唱得好唔好聽，大媽跳舞好唔好睇…可能有人覺得「其實有個地方畀人唱吓歌
，發展嘅音樂文化都唔錯吖～」

但有個人，都想喺旺角行人專用區表演，而佢只係拎住把結他，表演咗唔夠一陣，就被警察趕走，
原因係佢唔係香港人…

而呢個人，就係大家都熟悉嘅日本街頭藝人Mr.Wally。

我亦聽聞過，有人試過帶結他音響學班大叔擺街唱歌，但唱咗一陣就有幾個疑似社團人士走埋嚟，
話呢個位置係屬於其他人，所有地方一早劃好晒位，唔係先到先得…

所以，你發現每一檔大叔搖滾團，每星期都企同樣位置。
不過我覺得最奇怪嘅係，即使佢哋唱得幾難聽，大媽嘅舞姿有幾影響市容，每晚都好多人圍觀…

每一檔都幾十人圍觀，佢哋會拍手、歡呼、甚至跳舞…

如果完全無人睇，呢班大叔仲會唔會繼續唱？到底「唔想被外國遊客睇到，怕影衰香港」呢個諗法
，係咪得我先有？

我朋友最後食完飯就返酒店，佢話唔想再破壞喺佢心目中嗰個旺角。

內容延讀：
【藍橘子】《當唱K時「新歌試唱」一首都唔識，代表你老了》
>>> LIKE我們fb <<<
fb.com/newmonday.com.hk