【藍橘子】《 恥笑落選港姐醜樣，算唔算網絡欺凌？》

「大家好，我係畀全香港人恥笑嘅其中一位落選佳麗。我由細到大嘅夢想就係做香港小姐，我知我嘅外表無可能贏，但我只想為夢想努力一下。

　
估唔到網民會瘋狂轉載我張相，而家連身邊朋友都笑我，親戚叫我唔好丟架，公司同事個個喺背後恥笑我…」
　
以上只係設計對白，但我相信當事人會有相同感想。

每年選美，大家最期待嘅唔係見到靚女，或者睇最後冠軍係邊個。
大家最有興趣嘅，係一班明知自己初選就會落選，亦會被傳媒問啲攻擊性問題，再拍晒高清被網民恥笑，但都照樣去參加嘅佳麗。

先唔討論傳媒呢種兜口兜面問人有冇整容嘅手法有冇問題，因為的而且確，觀眾最想見到嘅就係佢哋被問到口啞啞嘅樣。
但當大家逐個佳麗幫佢哋改花名，每張相放大嚟恥笑嘅同時，有冇諗過對方嘅感受？

可能你會話：「佢醜樣無問題啊～但做人最忌就係太有自信嘛，出得嚟行，預咗要還…佢呢副尊容，走去參加選美預咗畀人笑㗎啦～人唔笑狗都吠啦！」

我記番起細細個，每年小學陸運會，我都會參加100米賽跑。但唔係因為我跑得快，相反，我每年唔係跑最尾就係尾二，我真係好鍾意喺跑道鬥快嗰種感覺。

直至升上中學，中一跑第尾畀同學笑足我全年，下年驚畀人笑就無再參加。但相隔多年再諗深一層，每次比賽都一定會有個跑最尾，鍾意跑又驚乜畀人笑呢？
有句說話，人們並唔鍾意睇別人成功，人們只係鍾意睇成功背後嘅故事。

如果一個人因為意外毀容，但佢夢想就係參加選美，雖然贏唔到冠軍，但佢嘅故事感動到評判，於是畀佢參加正式選美，而喺電視機熒幕見到佢嘅各位，仲會唔會笑佢醜樣呢？

網民恥笑佳麗整容、肥、醜、老，當好多人認為道理企喺佢哋嗰邊，就可以不留餘地咁去恥笑，咁其實又算唔算係一種網絡欺凌呢？
內容延讀：
2017香港小姐首輪面試 驚嚇程度爆燈
>>> LIKE我們fb <<<
fb.com/newmonday.com.hk