【藍橘子】《你還記得第一次著孖煙囱，任劍揮的感覺嗎》

相信作為男人嘅都好清楚，公廁嘅尿兜雖然相隔唔遠，所以尿兜企位亦好講究，如果得三個尿兜，第一個入去廁所嘅應該企最左邊或最右邊嘅尿兜。
如果第二個人入嚟，照道理會留空中間個兜，隔一隔…畢竟同性相拒，兩條巨龍相距咁近，係有啲尷尬。
作為男人，正常都唔會去偷瞄隔籬條友條巨龍，但有一次，我去商場廁所就發生咗件好難忘嘅經歷。

由於左邊尿兜地下好大灘「黃雨」，所以我就行過少少去中間嗰個。就喺我屙尿屙到一半嘅時候，負責清潔廁所嘅阿叔就走入嚟。
佢見到灘黃雨就歎一歎氣話：「條喉都未控制定，點做男人啊！」
呢個阿叔係嗰種見到乜人都會搭兩嘴嘅人嚟，總係鍾意對住空氣自言自語，我又唔知點應佢好，惟有禮貌上尷尷尬尬咁笑一笑。

就喺我拉褲鏈嘅時候，阿叔突然同我講：
「咦～細佬～原來你鍾意著孖煙囱㗎？」
「吓…係啊…」
我聽到當堂虎軀一震，明明我只係拉低條褲鏈再橫揪條巨龍出嚟，點解佢會睇到我著孖煙囱？！
愈諗愈心寒，我急急腳行過去洗手，手都未抹就諗住閃人，點知阿叔臨尾補多句：「我就唔太鍾意任劍輝喇～」
黐線…我頓時有種被癡漢非禮嘅恥辱感。不過Tommy叔呢句「任劍輝」，的確勾起咗我初嘗孖煙囱嗰種蛻變滋味。
記得當年係中一雞，上體育堂前要去廁所換衫，同學陸續換晒孖煙囱，而我仲著緊三角底褲，當時我唔敢喺同學面前換褲，惟有走入廁格好似隻縮頭烏龜咁換。

我有要求過阿媽幫我買孖煙囱，點知佢話：「你阿公以前打仗嗰陣，底褲都無得著啊！」
我唔明兩者有咩關係，但阿媽就係唔肯買畀我。我零用錢每日得十蚊雞，搭埋車想買支可樂都要儲兩日，惟有每日儲少少，去街市買咗廿五蚊兩條孖煙囱。
我每星期得一日體育課，兩條夠我梅花間竹咁換，其餘日子著番三角褲。
但係，著過孖煙囱真係返唔到轉頭，嗰種自由奔放嘅感覺，就好似離開鳥籠嘅雀唔會再想返去。
脫北者就算去到南韓幾辛苦都好，都唔會返去北韓。比卡超第一次畀小智放完出嚟，就以後唔想返入精靈球一樣。
但紙係包唔住火，有同學問我點解來來去去都係著同款孖煙囱，我只能夠大聲夾惡咁鬧番佢：「黐線！孖煙囱都係為咗舒服啫，唔通著七彩螢光立體大笨象啊？！」

忍受咗成年，阿媽終於幫我換晒做孖煙囱。My Dragon is free！
我行返出商場，回憶童年著孖煙囱嘅經歷，行返去商場公廁搵女朋友繼續約會，當女朋友見到我時，佢好驚嚇咁同我講：「喂你條孖煙囱凸晒出嚟啊！」
我低頭一睇，明明有拉褲鏈喎…
女朋友：「後面啊！」
我用手摸一摸背脊，原來件恤衫攝咗入條孖煙囱入面！
頂！唔怪得廁所大叔問我係咪好鍾意著孖煙囱，我回想緊全日返工係咪都一直攝住，但一直無人同我講？
呢一刻，我感受到社會冷漠人情冷暖，每日見班同事仲多過見屋企人，但佢哋無提醒我。但一個陌生嘅大叔，竟然用「任劍揮」嚟提醒我無攝番好條孖煙囱。

但係，點解佢唔直接同我講？唉…難怪啲人話同老一輩真係好難溝通！
 

內容延讀：

【藍橘子】《每個男人whatsapp都有一個男人群組》

>>> LIKE我們fb <<<
fb.com/newmonday.com.hk