我終於離地 iFly@新加坡

（專欄新血）【搶試新gadgets by Ocean】呢篇係我第1篇喺《New Monday》嘅稿，以後會主力介紹下啲玩物喪志、得意過癮又冇乜實際用途嘅電子gadgets，又會寫下
旅遊時見到玩到食到嘅得意嘢。不枉我近呢幾年不停吃喝玩樂又搞下啲gadget小生意，終於可以同大家分享，獻下世。
好！第1篇就講下開心到飛起嘅iFly。早前出trip飛咗去新加坡3日，其實正式工作時間加埋都冇3粒鐘，其餘時間美其名係去觀摩考察，實情都
係去玩，順路見一見老友呃餐飯食。第2日朝早開完會，就跟客人揸車去喺聖淘沙嘅iFly，體驗一下「離地」嘅滋味。

根據iFly嘅經理講，現時想玩呢種玩意，東南亞只有聖淘沙先有得玩，跟住就要去到杜拜先有，所以梗係要試下啦。
先講收費，99蚊坡紙約580港元就可以玩1個session，當中包括大約15分鐘嘅簡短briefing、flying suit、頭盔、眼罩租用，同每人可以由教練陪
同下試飛2次，而每次試飛時間係45秒。
Briefing後，大家就一齊換flying suit、頭盔，當全部人ready晒後，就排排坐喺個wind tunnel外圍，咁教練就會安排逐個進入內部陪飛。到我嗰
陣，心情都有少少緊張，都唔知嗰4把風扇點吹得起成180幾磅嘅我。一入到去，我就根據之前briefing指示咁成個人直立式瞓落去，一落去先

知啲風真係大到無倫，只要再將雙手叉開、雙腳放鬆、頭向上望，個人就會自自然浮起，因為始終係第1次玩，個人一定會左搖右擺，啲十級
強風又會吹都你fing手fing腳，咁教練就會喺呢個時候扶一扶你，等你可以飛得靚啲，俾裡面嘅相機幫你影張靚相留念。
當飛咗45秒後，教練就會扶你飛去出口再安全着陸，跟住全部人又排隊玩第2次，當所有人都玩晒2次後，教練就會問有冇人想再飛多次，再
飛多次係要加30蚊坡紙，但好玩在呢次教練會扶你一齊飛起，重可以飛到上大約5、6米咁高，因為之前頭2次都唔會飛得太高，最多2米左右

，如果覺得好玩嘅，就可以試下高飛直墜嘅感覺。玩完之後，就可以影下相同換番衫，跟住就可以落去入口度睇番剛才影嘅相同video。當然
可以俾錢買番，我就買咗張留念喇（SGD35）！
我會極力推薦大家去試一試，一來過癮，二來唔係度度有得玩，三來係相當安全同冇跳降傘咁大壓力，因為我都跳過降落傘，其實嗰種
floating感覺都幾似，咁當然冇咗free fall呢part，但相對又平好多，又唔會被天氣影響到。貼士係最好早1、2個星期喺網上做定reservation，因
為會平多少少，同唔會去到滿咗冇得玩，加上星期六、日都幾爆下，如果去到冇得玩就掃興啦！

iFly查詢：www.iflysingapore.com

Ocean Wong’s Profile
或者直shot叫噢唇，本地資深gadget達人，開設Oasis Tech科技公司，代理多個sport gadget品牌，更係試機王，最鍾意搶住晒試新嘢。噢唇重成
立HKKU（香港車神聯盟），專搞小型賽車比賽，自己都會落場鬥，人重，但手車好快。佢會喺度同大家分享下各類科技嘢，試機、爆料樣
樣有。

Oasis Tech Company
HKKU