【藍橘子】《睇戲最無品，旁述劇情、食嘢大聲、特登買隔一個位係咩玩法？》

睇戲一向都係香港人娛樂，任達華『電影業畀你搞彎晒』睇足十幾年，到而家已經無乜人喺香港盜錄。

但總係有人唔識睇戲時尊重其他觀眾，手機唔熄靜音，有時就算有靜音，個螢幕光到好似探射燈咁，一條光柱
射上天花板，唔知以為召喚Batman登場。

不過最常遇到嘅情況，都係旁述劇情、食嘢勁大聲、亦有少數人會特登買隔一個位用嚟放手袋…

如果你睇嗰套係動畫，當日又係放假，難免會有小朋友喺旁邊不斷問問題：「點解嘅？做乜啊？佢地死咗啊
？！」

但唔知點解硬係班成年人唔識睇戲時靜一靜，鍾意一邊睇一邊估劇情，仲驚死其他人聽唔到咁…

早前睇套戲叫《死亡無限Loop》，坐我旁邊嗰條友一開場已經講：「呢個一定係兇手！」。睇到最尾又大
叫：「嗱！我都講咗啦！係咪啊！」

呢類情況試過好多次，每次我都會大聲『噓』呢類多口怪，有一次竟然被鬧返轉頭：「唔畀人講嘢自己包場睇
囉！」

噪音真係會令人投入唔到去睇戲，就好似戲院提供零食，我覺得無問題，一邊睇戲一邊食爆谷的確係幾爽，但
希望食嘢嘅觀眾盡量細聲啲。

一開始都講過，喺香港睇大片要爭位買飛，但有少部分人特別喜好隔一個空位先買，我已經遇過幾次呢種情況
，唔知買飛嗰位有心定無意，預留一個空位，入場後方便畀自己放手袋。

可能你會覺得隔一個位買都犯法咩？有規定唔畀食嘢大聲啊？

其實喺生活細節上，就可以睇出一個人嘅品德。如果每個人都可以多一份同理心，做事前顧及其他人感受，相
信香港就唔會好似而家咁，個個都咁燥底。

內容延讀：
【藍橘子】《約極都約唔成嘅飯局，原來時間真係沖淡一切，包括友情》
>>>LIKE我們fb<<<
fb.com/newmonday.com.hk