東張西望｜爆出勁多信用卡盜用苦主 「OTP」、到底係保障邊個？

信用卡被黑客盜用 銀行出招避責

有苦主上《東張西望》講述自己信用卡被盜用，但最後銀行都要求卡主承擔返個費用，銀行會以「不會接納透過一次性密碼授權交易的爭議申請」的理由而將責任推向卡主身上，即係好多信用卡的交易通常會發一個叫「OTP」密碼短信到你的手機中，輸入完密碼就代表完成交易。

苦主被連環盜刷19萬 因為OTP而照硬食？

報導中，有一位苦主王先生就講述自己被黑客盜刷19萬！王先生俾咗一張附屬卡女兒去英國留學備用，女兒一直少用，但直至今年突然收到一項可疑交易短信，指佢合共進行咗19萬的交易，佢10分鐘之內打去銀行問吓，一問之下先發現有3單可疑交易，已喺半小時內完成交易，王先生立即清楚表明3單交易都唔屬於佢，亦強調無收過OTP，3單可疑交易仲係一間背景奇怪虛擬貨幣公司。銀行最後以無辦法識別到所有虛擬交易嚟解釋此事，6月13日時更將交易金額記到王先生的帳單上，要求佢俾錢。王先生堅持解釋佢女兒張電話卡都無用，點可能收到一次性密碼確認交易，佢公開咗電訊公司紀錄，無用過任何數據傳輸。不過銀行無接受王先生解釋，王先生唯有報警求助，更電郵到銀行極高層都係無用。最後銀行出返張新卡俾佢之後，第2日就即刻再次俾黑客盜用，仲要係同一間虛擬貨幣公司，交易再次成功，王先生表示真係該銀行極不負責任！

完整影片：

網民神秘中招「$2888.88」！

東張西望一播完即刻有網民於討論區發起討論指自己都中招，被盜刷咗＄2888.88，跟而立即有唔少網民都回應自己都同樣被盜刷咗＄2888.88！更指出打去銀行處理都係無用，不如打返去間店處理得仲快。