新抱網上發文炮轟奶奶十宗罪！薑醋？無！迫吃過期4年補品

撰文：海月｜圖片來源：BB來了

新抱網上發文炮轟奶奶十宗罪

新抱炮轟奶奶十宗罪 1： 臨盆唔准坐的士

新抱事主在臨盆前幾天，因為「見紅」所以立即準備入院。不過由於住村屋，去醫院非常麻煩，需先搭巴士出市區再轉車。所以新抱本想直接坐的士，但奶奶就認為並非馬上要生，所以不用搭的士，希望她可以搭巴士再轉鐵到醫院，幸好最後老公懶理照叫搭的士。

新抱炮轟奶奶十宗罪 2：處事不分先後

當到醫院後，估唔到奶奶更懶理臨盤新抱，叫正打算辦理入院手續的老公先幫自己處理「醫邊通」，幸好老公沒有理會奶奶，依舊先幫太太辦理入院手續。

新抱炮轟奶奶十宗罪 3：坐月慘到無飯食

生完BB「坐月」一定過得好？新抱事主表示坐月才是惡夢開始！原來新抱事主喺坐月期間，晚飯前都「無啖好食」，就連一碗白飯都無，只有一個饅頭l同一條粟米，直至老公及老爺回家先至有正常飯食。

新抱炮轟奶奶十宗罪 4：坐月繼續做家務

雖然傳統坐月期間都忌碰水，不過呢個慘劇新抱連飯都無得食，當然坐月期間家務都要樣樣做齊。甚至有一日新抱事主因為做家務到太餓，結果只好懶理坐月不能見風禁忌，自己落街買排骨飯食。

新抱炮轟奶奶十宗罪 5：坐月薑醋？無！

正常唔少家庭喺新抱生完BB後，都會煲坐月薑醋俾新抱補補，不過呢位慘劇新抱就無得食喇！因為奶奶將薑醋都用來招呼自己親朋戚友，結果新抱事主只好打電話俾自己媽媽，媽媽立即送上炒薑飯和燉雞先有得食。

新抱炮轟奶奶十宗罪 6：迫吃過期4年補品

因為新抱事主頭一、兩個月都餵人奶，但有一日奶奶突然拎一盒紅蔘片叫新抱事主吃，但就說明經已「過期4年」，更指自己同老爺食完都沒事。不過新抱怕影響BB就決定唔食，結果反被奶奶發癲指「點解唔食搞到過曬期」。

新抱炮轟奶奶十宗罪 7：無視BB安全玩拋高

因為初生嬰兒頸椎十分脆弱，所以就算抱起時都應該用手托好頸、頭部。不過新抱事主就多次見到奶奶將BB高舉玩拋高，多次反映話唔好亦被無視，最後要老公出口罵先停止呢個行為。

新抱炮轟奶奶十宗罪 8：湊B方式成導火線

新抱事主指當BB只有6個月大時，奶奶竟然將蘋果俾BB咬，更表示「BB食到唔識自己吐出嚟」，令新抱事主崩潰，最後要狂Send資料俾奶奶睇先停止瘋狂行為。

新抱炮轟奶奶十宗罪 9：任由BB咬拖鞋

當BB略大識得爬行後，竟然拎起一隻拖鞋咬，不過奶奶見到後竟無阻止，更表示「拖鞋已經洗得好乾淨，唔會有問題」，今次新抱事主終終爆發「覺得佢癲癲哋」。

新抱炮轟奶奶十宗罪 10：BB發燒唔俾睇醫生

有日BB首次發高燒，更燒到39度，就算食藥後都無退燒。過咗一晚後新抱決定帶BB去醫院睇醫生，不過奶奶竟然怪新抱「咁早就帶佢去睇醫生」，更認為應該等BB再燒幾日後先去，不過新抱事主當然少理。

雖然新抱事主網上發文後，有唔少人都力撐，不過最後新抱事主都覺得各有問題，決定刪文了事，最緊要都係BB快高長大。