【曠工之王】66歲男人曠工15年、爽袋500萬人工！無人發現原因竟然係…

撰文：Andy｜圖片：《愛回家》截圖｜編輯：海月

曠工15年 爽袋53萬歐羅 被控告濫權、偽造文件加勒索

南部卡坦扎羅一間醫院66歲男員工，由2005年開始已經曠工，但一直支取全薪。咁多年來，佢一共袋走超過53萬歐元（約500萬港幣）工資。被意大利傳媒形容為「曠工之王」！

意大利警方稱，該男員工係政府公務員，自2005年起被派至醫院上班。但佢簽約之後就冇再去過該醫院。

當年，時任醫院高層曾發現佢曠工，並打算撰寫紀律報告揭發佢。但該男子獲悉高層打算揭發自己曠工之後，佢直接恐嚇高層，指若自己被揭發會傷害高層嘅家人。該名高層不久之後便退休，而該名男子亦成功繼續曠工。

此後，醫院高層繼任人和醫院人事部，一直都冇發現該男子曠工。直至意大利警方舊年從上班、出糧紀錄以及員工證詞中揭發事件。男員工舊年9月被辭退，現時被當局控告濫權、偽造文件和嚴重勒索。佢嘅六名上司亦被調查。

意大利公務員返工態度消極 醫生、警察都經常曠工

意大利公務員返工消極係「國際知名」，醫院職員和警察曠工都經常被爆出。2017年警方揭發南部那不勒斯一間醫院有人代同事「打卡」扮上班，涉及近百個醫生、護士和社工，而首都羅馬更試過有一日，8成警員一齊請病假。