【張晨】《已經很久沒有更新過的通訊錄》

記得中學嘅時候，擁有人生第一部手機。
當時好熱衷於一樣嘢，就係「Save低對方電話」，將手機入面嘅通訊錄塞滿。

會好認真諗Save對方做咩名，甚至幫佢作一啲花名。
總之每個號碼都有名有姓。

出嚟社會都好多個年頭，
近年我發現，我已經好少Save人電話。

反正有咩需要，雙方都總有一兩句Wtsapp留低，搵得到佢電話號碼，
憑Profile Pic就知自己有冇認錯人。

漸漸，工作上認識嘅新人、圈子中出現嘅點頭之交、因緣際會而認識嘅朋友。
好多好多，都冇Save低電話。

因為你開始預計到，
好多人同你嘅第一次聯絡，其實就係最後一次聯絡。

好似我係A公司，佢係B公司。
一齊開會當然好多嘢傾，換晒電話Wtsapp夾下點做。

但第二日公司話「個Project我哋唔做啦」，
你同佢就會自然地「老死不相往來」。

當你處於「社會大學」嘅成熟期，
因為工作或社交上嘅需要，
你明白到「點頭之交」已經好高端；
有種人際關係叫「一面之緣」。

真係只有一面，難有第二天。

所以，當大家交換電話，有咗第一句Wtsapp之後，
我都懶得Save，任由天意。

因為事實證明，大部分你冇Save嘅人，多數真係冇咩下交；
即使你Save咗，幾年後都發覺可以delete番。

細個有幻想，希望自己會好多朋友，
大個先明白，以我哋嘅生活節奏，唔好話新朋友，
即使要Keep住班舊朋友都唔係易事。

通訊錄良久沒有更新，
舊聯絡人都開始慢慢忘記。

我也再非「要將通訊錄塞滿」的那個自己。

內容由博客提供及授權轉載，不代表本刊立場。

內容延讀：
【張晨】《贏了 自尊心 ，卻輸了一個重要的人》
>>> LIKE我們fb <<<
fb.com/newmonday.com.hk