【張晨】《贏了 自尊心 ，卻輸了一個重要的人》

內容由博客提供及授權轉載，不代表本刊立場

咁多年嚟，有一句廣告Tagline我認為係好出色嘅。
就係「贏咗場交，輸咗個家，值得咩？」

你睇張海報，一定會答「緊係唔值啦！」

但設身處地，一時火起，內心一種叫「自尊心」嘅物體一湧出嚟，
莫講話冇咗頭家，你就算冇埋個頭，呢場交，你都「捨命陪君子」。

阿強作為過來人，淡淡拋下一句：
「自尊心，係一種『只有呢一秒先值錢』嘅嘢，
而因為自尊而放棄嘅人，係『隨住每一秒過去，而愈來愈值錢』。」

阿強都年少氣盛過，極度要面，
有時係無聊到佢講個笑話，女朋友覺得唔好笑，
都會黑晒面，逼個女朋友笑，一定要落到台嘅人。

每一個面子工程，都引發一場唔太需要嘅爭吵，
佢永不讓步，一鬧到尾。

可惜所有關係，都係破壞容易，修補困難。

我問阿強，每次吵完大鑊唔後悔咩？
佢苦笑：「沖涼嗰下就會後悔。」

冷靜落嚟，佢先發現，
有啲自尊只係自己嘅任性，甚至係一份幼稚。

而受罪嘅係對方，承受嘅係雙方。

阿強最後成功贏到最大嘅自尊心，
亦同時輸咗最重要嘅人。

曾經視為最重要嘅自尊心，今日一文不值；
曾經可以瀟灑放棄嘅人，今日已能成回憶。

佢話，做人成長嘅一課，就係喺自尊心嘅衝動下，跳出嚟用第三者角度睇件事。

唔係叫你永遠做下把、永遠讓步，
只係好多時，比起「無理取鬧」，一個「無言擁抱」會令你嘅人生少一份後悔，多返一兩個你珍惜嘅人。

我知道聽落簡單，但每個人，都要用一輩子去學習。

內容由博客提供及授權轉載，不代表本刊立場

內容延讀：
【張晨】《在我們還未懂得戀愛時，遇上得太早的那些人》
>>> LIKE我們fb <<<
fb.com/newmonday.com.hk