獨家專訪！《狐忍》舞台劇演員：做鳴門唔可以講大話

我哋獨家訪問咗飾演鳴門、佐助、小櫻、我愛羅嘅4位主角再加導演，大爆劇中趣事，重會率先發布東京演出劇照，等大家感受下個氣氛先。
（PS：大會會送出20張、每張價值$480嘅《狐忍》舞台劇飛，詳情請留意我哋facebook。）

text-專題組 photo-由大會提供、網上圖片

http://www.youtube.com/watch?v=3mEd0fLVzTA

前寶塚導演揸旗

今次舞台劇主腦係曾任日本國寶級劇團寶塚歌劇團嘅名導演兼編劇兒玉明子。佢讀大學時已經入寶塚做part-time，97年正式加入，之後曾到過加拿大學劇戲，亦跟過名導演Robert Lepage學藝，實力無庸置疑。唔想上鏡嘅佢就話，今次接到要將《狐忍》改編為舞台劇嘅差事，都有諗過一陣接唔接。「有啲不知所措囉，因為原作嘅1-27卷係個完美嘅分節點，當時我真係唔知可唔可以將佢濃縮成為2個半小時左右嘅舞台劇，要交代劇情又要好睇，好難㗎。」

高科技場景

明子老師話，佢今次舞台劇嘅目標係要令冇睇過原著又或死忠粉絲都要睇得開心。「我接觸嘅岸本老師，喺溫柔嘅外表下，有1顆溫暖大愛嘅心，所以佢先寫得出咁好嘅作品。今次同佢見面討論，大家都認為着眼點應該係展現故事主題方面：無論遇到任何情況，只要唔放棄希望，努力生活，就一定會遇到重要嘅人、重要嘅世界……我哋大家都希望無論大人或細路仔、日本還是國外嘅觀眾，睇完今次舞台劇都可以精神大振，充滿正能量。」
除咗劇本，明子老師重叮囑大家要留意舞台設計。「為咗將Naruto世界嘅忍術搬上舞台，我哋用咗好多高科技、數碼技術融入演出，希望大家可以喺劇場中感受到舞台劇獨有嘅魅力。」

內容延讀：

＞睇埋狐忍東京展覽

＞同埋狐忍外傳解構

4大演員專訪：

我哋就訪問咗4大主角，咪睇佢哋年紀細細，全部都已經係獨當一面嘅演員！

松岡廣大（飾鳴門）

Profile：97年東京出生，2009年4月進入日本藝能界，代表作有音樂劇《網球王子》，松岡最著名係佢驚人嘅體力同難度高嘅肢體動作，佢飾演無限體力嘅鳴門就最啱。

演出時期唔講大話。

松岡話要自然咁演出渦卷鳴門嗰種孤獨同天真無邪，最緊要做到佢絕不食言、率真個性。「為咗演好鳴門，我自己喺呢段時期都會身體力行，對任何人、喺任何情況都唔可以講大話，而做任何事都會全力以赴。因為鳴門嘅特點就係咁，我自己都要咁做，先可以拿捏到個角色。」

松岡話演繹時另一樣要注重嘅，就係同飾演佐助嘅佐藤流司嘅交流，因為2人嘅關係，正正係推動整套舞台劇嘅靈魂。「其實我同佐藤嘅關係，都幾似鳴門同佐助㗎，大家會一齊工作，又會交流比併下演技，而且大家都樂在其中。記得排練初期，每個人都漫畫不離手，大家一齊狂練結手印，無時無刻都參考原著，推敲更準確演技，真係好似喺《狐》中練忍術咁認真！」

佐藤流司（飾佐助）

Profile：向日葵劇團成員。 代表作有音樂劇《忍者亂太郎》同《網球王子》，被喻為演唱俱佳嘅實力派演員，運動神經亦一流。

佐助一啲都唔聰明

佐藤本身並非《狐忍》粉絲，不過為咗演好佐助一角，佢話接劇後就開始擠出睡眠時間，將「終結之谷最後一戰」（第1部漫畫鳴門同佐助最後一戰嘅重頭戲）嘅DVD睇咗無數遍。「我將漫畫當然亦由頭睇1次，最後我都變為粉絲。我覺得佐助內心好複雜，雖然大家都認為佢係聰明人，但實際上佢比任何人都要苦惱同迷惘，另一角度睇，其實佢並唔聰明。為咗演活佢，我喺舞台上表演嘅時候，會時刻注意音色同舉止等細節，希望觀眾睇到同佢哋喺動畫睇到嘅，係一樣嘅佐助。」

內容延讀：

＞睇埋狐忍東京展覽

＞同埋狐忍外傳解構

伊藤優衣（飾春野櫻）

Profile：1994年群馬縣出生。曾喺電影《告白》同音樂劇《美少女戰士》演出。

我命中註定演阿櫻！

個樣同我哋阿嬌有9成似嘅伊藤優衣，係《狐忍》忠粉，佢話自己係命中註定演出阿櫻一角。「我同阿櫻都係喺春天出生，有種命中註定嘅感覺。喺東京演出時，就曾經喺舞台上慶祝春野櫻嘅生日同我嘅生日，感覺好唔真實！不過演阿櫻好有難度，因為佢係個愛恨分明、氣場強大、情感外露嘅人，我自己就比較內向。但我喺舞台嘅目標，係要演到原著中嘅阿櫻，因為佢呢個角色對鳴門嚟講係不可或缺嘅人物，係鳴門心靈最強大支柱之一。要演活阿櫻，就要有源源不絕嘅活力！」

須賀健太（飾我愛羅）

Profile：1994年10月19日於東京出生。5歲已經開始童星生涯，02年參演電視劇，之後曾參與無數電影及舞台劇，行內被稱為天才演員。

啲沙好難搞！

被評為最似原著漫畫角色我愛羅外貌嘅須賀健太，亦係從小已經係《狐忍》迷，除咗鍾意睇漫畫同動畫，佢重鍾意打以《狐忍》為主題嘅電子遊戲。「我打機都係最鍾意用我愛羅，因為有型力量又強大，好好用。今次接到我愛羅呢個角色，我覺得最緊要考慮到佢內心深處嗰種孤獨感同悲傷。我同明子老師商量過好多次，要演我愛羅最緊要唔好將佢演成1個殺人者，1個壞人，因為佢只係通過傷害人去證明自己存在，其實佢內心都好痛苦。所以當佢遇到都係孤兒，但以另1種方式生存嘅鳴門時，我愛羅嘅內心就起咗變化，由惡變善。所以我認為今次最緊要演好同鳴門四目交投嗰場對手戲。」

健太話對於演繹上佢都有信心，不過最難搞就係我愛羅啲沙。「喺排練時候最難搞就係嗰啲沙，成日都搞到成身成地都係，好彩公演時一啲問題都冇，真係謝天謝地！」

Live Spectacle《NARUTO-火影忍者》

日期：5月22日 至5月24日

時間：7:00pm（5月22日）；1:30pm、7:00pm（5月23日至5月24日）

地點：澳門威尼斯人劇場

票價：$1,080、$880、$680、$480、$280

購票：www.hkticketing.com.hk/（快達票）

官網：naruto-stage.jp/staff.html

內容延讀：

＞睇埋狐忍東京展覽

＞同埋狐忍外傳解構

送總值$9600《火影忍者》（狐忍）舞台劇門票

《火影忍者》（Naruto）亞洲巡迴舞台劇Live Spectacle《 Naruto-火影忍者》，繼東京站首演後，5月22日至24日將會移師澳門威尼斯人劇院公演。係咪好想去呢？各位火影迷有福了，我哋會送出總值$9600《火影忍者》舞台劇門票俾大家，等大家可以入場欣賞演員精采嘅演出。

Live Spectacle《NARUTO-火影忍者》

日期：5月22日 至5月24日

時間：7:00pm（5月22日）；1:30pm、7:00pm（5月23日至5月24日）

地點：澳門威尼斯人劇場

*注意：門票嘅日期、場次都係隨機派發。而且時間緊迫，請預留時間嚟取票。

現送出《火影忍者》（狐忍）舞台劇門票10套（每套2張$480門票）。想要嘅朋友，請留意遊戲玩法，即有機會獲得。

・於網站comment/留言位置分享你鍾意《火影忍者》嘅原因。

・填妥表格及遞交。

・《New Monday》將會揀出心水答案。

・得獎名單將會喺網站公布，得獎者將獲電郵通知。

遊戲截止日期︰19/5（晚上11時59分），得獎者將獲電郵通知。

《New Monday》保留最終決議權

鳴謝：Live Spectacle《NARUTO-火影忍者》製作委員會2015

內容延讀：

＞同係日本漫畫《ONE PIECE》喺台北搞跑步精美選手包完全睇

＞《復2》入面一樣有好多精釆場面，睇下背後激似本尊嘅動作替身