【倒轉睇世界】六維世界可以反地心吸力？齊齊學做六維攝影師！

撰文：Keith@新假期｜編輯：Gabriel｜ 拍攝：Man、生活在六維空間的男生

【倒轉睇世界】六維世界原來係咁過癮！齊齊學做六維攝影師！

生活在六維世界 趴街的男生：「我哋想香港人開心」

平日畀人鬧「趴街啦你！」生氣是必然。但這兩名大男生，竟然無畀人鬧都主動去趴街，仲要笑住口去趴，天下之大果然無奇不有。原來他們通街趴、周圍瞓，為的只是影一張錯視六維相片。「生活在六維空間的男生」成立近6年，是個由兩個大男生主理的攝影團體，一個是室內設計師臘味，另一個是AM。他們二人各有正職，搞「六維空間」只是興趣使然。

到底甚麼是六維？二維是2D、三維是3D我就聽過，六維豈不是6D？臘味解釋：「我們的六維並非科學中的空間概念，而是思想上的一種新想法新空間。而我們的攝影是玩空間，既然有1-5維，咁就叫六維啦！」而他們的六維相是運用想像力及借位的錯視相。坊間的錯視相片多是利用前後景，形成錯覺，例如扮巨人等小伎倆，但六維男生們則是整個空間都運用到。想知咩係六維相，繼續拉下去睇吧！

開OT突然靈感爆發 隨手一影就是六維相片

如此抽象的六維相片，莫講話影，記者我睇得耐都頭暈。誰知他們的第一張六維相，竟然是在公司OT時無聊隨手一影而成。原來臘味小時候已經天馬行空，愛幻想太空漫步，經常想如果人可以在天花、牆上行會怎樣。在六年前，臘味於公司OT時，夜闌人靜獨自一人，創意爆發的一下奇想。「我突然想到不如躺在地貼著牆影張相，跟著就傳給好朋友AM睇，誰知AM都要想了一陣才明白在做甚麼。」後來二人都覺得這種拍法很有趣，第二天立刻去試影如此因這次OT就開始了六維的生活。

影之前要拉筋 碌地瞓街齊齊影

睇完上面這麼多六維靚相，新手們唔使擔心，因為六維相其實唔難影，熟能生巧！記者就跟臘味新手上路齊齊影。角度方面，新手一開始可以先四正地拍90度、180度的錯視六維相，地點方面，最好在天橋和隧道，因為空間感簡單、易應付。而動作方面，不外乎倒轉坐、扮跑及扮爬牆，只要想像平時在平地時的自然動作就可。

香港人好友善 無人鬧阻街 反而Join埋一齊影！

影咗咁耐，你可能會問，又瞓街又滾地，無畀人鬧阻街咩？誰知臘味和AM在這拍攝六維相的六年間，不但沒有遇到街坊鬧阻街，反而帶起了社區的聯繫，拉近了人與人之間的距離。臘味指：「一開始都怕 ，但你唔試、唔行出第一步就唔會影到。」而久而久之也習慣了別人的目光，百毒不侵。他更指：「香港人幾友善，見我哋瞓晒地，都係好奇居多。更有人笑住提醒地下好污糟好多痰咪瞓啦，沒有人會話你阻住晒。」

其實六維攝影更像行為藝術，在小社區拍攝，街坊會話「幾得意喎」或者「我知道佢哋影咩啊」，甚至拿出手機跟他們的角度一齊影。臘味覺得此舉可以拉近人與人的距離，帶動社區聯繫。但要注意在私人地方拍攝會被保安阻撓驅趕，例如他們倆第一次出動，就是在地鐵站、臨近尾班車時間，他們瞓在地下貼著車門拍攝，誰知被人開咪說「乘客請勿瞓在地上」，都是有趣的經歷。

其實兩位男生又趴又瞓搞咁大單嘢，都是想香港人跳出自己的框框，突破日常想法。香港人，換個角度其實會更開心呢，這樣才是進入了「六維空間」呀！（溫馨提示，拍攝時請以不妨礙他人及進入私人地方為大前提）