【張晨】《 中學嘅一班同學；大概都係一世嘅朋友》

內容由博客提供及授權轉載，不代表本刊立場

邊個時段認識嘅人，會陪自己最耐？
呢個答案，或者人人唔同。
但我就覺得 中學 係最特殊嘅時間線。

因為你哋經歷嘅「第一次」實在太多。
第一次戀愛；
第一次失戀；
第一次玩通頂；
第一次反抗老師；
第一次征戰公開試……

好多你會記一世嘅畫面，都喺中學呢五、六年發生。

而且去到中學，先會萌生一種「真性情」，即係開始有一套自己嘅價值觀。
呢種性格往往跟一世。

比起小學嘅青澀；大學時開始識得戴唔同嘅面具。
中學的確係「最做到自己」。

而呢班同學，認識嘅就係最狂妄嘅你，嗰個將缺點表露無遺嘅自己。

咩瘀嘢都見識過，但依然同你Fd、同你熟、同你keep Contact。

有時喺社會碌耐咗，你會覺得明白自己，同真正認識自己嘅人已經唔多。
人生難免有少少寂寞。

工作上搵幾多、有幾多成績，但到頭來，你連做番自己都唔得。

但見到呢班中學同學，你總算有幾秒嘅喘息時間。
因為你點演繹自己，高高在上定低低在下，喺佢眼中，你都係中學嗰個人。

其實你哋中間未必成日聯絡，甚至有啲人職業性失蹤。
見面話題又無限loop，都係返咗去中學那些年。

但係，嗰幾年嘅話題，已經夠Loop一世。
社會好多顧忌、好多考量，惟有佢哋，
唔需要日日傾電話，但有咩事，大家都會上水秒回。

你總係有嗰句講嗰句，即使一啲無心直話激嬲咗佢，
你心底都未驚過。

因為你心知，大家共同享有嘅十幾年，好多事都抵得過去。

內容延讀：
【張晨】《其實我們不想自己居住的地方，成為景點般的存在》
>>> LIKE我們fb <<<
fb.com/newmonday.com.hk