【藍橘子】《究竟要用幾多年，香港人去IKEA食飯識自己執餐盤》
【藍橘子】《究竟要用幾多年，香港人去IKEA食飯識自己執餐盤》
近年香港改變得愈來愈快，好多只係幾年無嚟香港嘅外國朋友，都講過同一番說話。
「每次嚟香港，都好似完全唔同晒。想食嘅餐廳執咗，同一個商場，有一半舖頭唔同晒。生活節奏愈來愈快，連旺角行人專用區，都同以前唔同。」
有人覺得香港愈變愈衰，有人覺得發展係好事。但作為一個香港人，有冇隨住社會愈來愈好呢？
有段時間，我好鍾意去IKEA餐廳食嘢，啱啱登陸香港時貪佢夠平，食物質素唔差，我可以坐低半日工作，可以任添咖啡，得閒食件cake幾鬼寫意。
唔知大家有冇留意到IKEA牆上嘅字，佢哋需要客人自己收拾好餐盤，放去餐盤回收嘅位置。
畢竟香港習慣咗食完拍拍屁股離開，有服務員會幫忙收拾餐盤。
無論係老麥，定係Starbuck、Pacific Coffee…香港同外國唔同，都有服務員負責執嘢。
IKEA一開始就決心要香港人改變呢種習慣，希望客人自己清理食完嘅餐盤，請少幾個人，以平價食物作為回饋。（唔知真定假）
起初可能客人未習慣，又或者留意唔到牆上面嘅字，大家都知啦，Facebook你寫多少少字都too
long didn’t read，何況係餐廳入面嘅字？！所以我眼見好多人食完就直接離開。
幾年過後，情況有冇變好呢？大家習慣有冇改變呢？
上星期去IKEA食飯，呢度已經變成一家大細最鍾意嚟嘅食堂，莫講話搵個靜靜地嘅座位做工作，想搵個位坐都難…
但IKEA唔單止多咗客人，仲請多咗好多服務員，負責幫客人收拾食完嘅餐盤、抹枱、掃地、推餐車…
無錯，香港人嘅堅持打敗咗IKEA嘅計劃，我哋習慣唔執餐盤，就死都唔會變！
早幾年喺網上不時見有人討論，去食老麥同去連鎖咖啡店飲咖啡，會唔會收拾好再離開？
有部分人話喺外國生活過，習慣咗執埋先離開，反正只係花費十秒鐘，自己食完自己清潔好正常。
亦有人話，老麥同咖啡店請得服務員，就應該留番畀佢哋清潔，IKEA由唔請人變成請人，增加就業機會，應該多謝我唔清理餐盤！
唔知大家覺唔覺得，呢部分人嘅思維，好似強國人口中：
「我來消費，我就是爺，你就要服務我，待我優先～」
「你認為我來香港搶學位？搶樓？搶香港人權利？我有交稅啊！！我孩子將來也為香港服務啊～」
先不討論IKEA事件嘅對與錯，但呢種「我有權力，就要做盡權力範圍內的事」嘅思維，好難令社會變得更好。
你無可能特登丟多啲垃圾，令清潔工人就業機會增加。故意犯罪，令警察就業機會增加…
想要改變現狀，首先要無條件地「信任」。
信任只要自己清理餐盤，IKEA真係會用平價食物回饋客人。
信任我支持本地產品，佢將來會做得更好。
信任只要做好自己，社會就會改變。
有咗信任，社會就會有同理心。而只要每個人將「同理心」放喺道德首位，就唔會出現為咗利益而
出賣香港嘅行為…
不過～IKEA嘗試咗幾年都宣告投降。
咁改變個社會，又要用幾多年呢？
內容延讀：
有沒有關於香港的有趣盤點？
香港地從來不乏心靈熱點，香港不少地方均設立行刑場，正正是大部分屋邨興建時的前身，盤點香港猛鬼屋邨 ，信不信由你！不少朋友都喜歡想當年，香港懷舊小食 及這10款最愛夾糖是不少人的共同回憶，沒有高檔的食材，卻塑造出最難忘的味道。提到昔日蒲點，旺角絕對係大家留低最多腳毛嘅地方，千禧年代必去蒲點 ，你又去過幾多個呢？
有甚麼必學生活小智慧？
天氣時熱時凍，容易令人患上小感冒，唔想次次依靠藥物？可以試試這8招必學鼻塞穴位方法及7大喉嚨痛舒緩方法。除了感冒外，生痱滋亦非常影響日常生活，坊間有各式各樣的解決痱滋方法，助你解決痛楚！
