乜都搶一餐 網民：「諗極都唔明呢啲搶嚟做咩？」學定3款食物保藏法

湯丸變熱門食材

至從傳出「禁足」後「盲搶炎」一直未有改善，只係想買吓日常用品、食材嘅網民咩都買唔到。如果真係禁足嘅話，有啲食物同日用品都明白真係有需要，例如罐頭、杯麵、醫療用品等。但有啲真係令人百思不得其解。有網民就係討論區表示想落街買包湯丸食，諗住湯丸應該唔會成為「禁足之選」，但結果都無一幸免！明明平時香港人都唔係真係咁鍾意食湯丸？

有網民表示還可理解，因為湯圓至少可以擺到一段時間同埋比公仔麵好食。

快過期食品

麵包、蔬菜最多擺得幾日就過期，相信好多人都知，但偏偏呢啲唔擺得嘅食材通通都俾人搶晒，唔通佢哋都諗到另類保鮮法？定係整分子料理？

估佢唔到日用品、食材

早前瘋傳避孕套被清空嘅消息，又係令網民非常費解。林作之前仲出post話condom係唯一無被清空嘅嘢，表示要檢討吓。

有唔少網民分析其成因，認為多數係因為心理因素、人群效應、成功感等。

買咗唔少嘢唔擺得耐嘅食物，又唔想浪費嘅市民，可以考慮吓以下嘅3種普遍嘅保存食物方法，睇吓會唔會解決到問題。

1. 冷藏法

   冷藏係最常見嘅食物保存方法，可以降低溫度抑制化學反應，同埋微生物增殖。如果係蔬菜，可以先將蔬菜用滾水煮熟，又或者盡量抽乾蔬菜中嘅水份先再冷藏，就可以令蔬菜無咁容易變爛，不過蔬菜最好都係新鮮食用。

2. 鹽藏法

   鹽可以吸收食物中嘅水份，令細菌無咁容易殖生，而且食鹽對微生物有直接嘅毒性，可以延長保存時間，就好似鹹魚就係用咗呢個原理。

3. 酸漬

   用乳酸菌降低產品嘅ph值，都可以做到抑制微生物生長，泡菜同酸菜就係一個好例子。

有網民已親自證實麵包用冷藏法係成功，不過大家都係跟返食品包裝上嘅有限日期食用啦，始終都係食落肚，而家病咗就好麻煩啦。