迪士尼一反常態谷反派！Gal Gadot令小朋友都唔再扮公主

迪士尼經典動畫 ‘Snow White’ 《白雪公主》嘅真人版電影喺今個星期四（3月20日）正式上映，美國首映禮後，網上紛紛大讚呢套係近年最好嘅真人電影。一幕幕經典場面變成真人演繹，令觀眾睇到津津樂道，充滿童年回憶。其中飾演 Evil Queen 邪惡皇后嘅Gal Gadot（姬嘉鐸）更加搶晒女主角 Snow White白雪公主 Rachel Zegler（麗素莎嘉娜）嘅風頭！

今次真人版就由女神Gal Gadot 飾演邪惡皇后呢個經典反派角色。今次絕對係佢一改戲路，罕有咁演反派，觀眾都好期待佢點樣演繹一個霸氣又神秘嘅邪惡皇后。Gal Gadot因2009年嘅飛車動作片《狂野時速4》嶄露頭角，但真正令佢走紅嘅當然係「神奇女俠」呢個角色。由《蝙蝠俠對超人：正義曙光》首次登場，到主演個人電影《神奇女俠》，姬嘉鐸成為超級英雄嘅代表人物。之後喺《紅色通輯令》、《尼羅河謀殺案》等電影中，佢都以勇敢機智嘅形象示人，正氣凜然。所以今次喺《白雪公主》入面，觀眾將會見到一個前所未見嘅邪惡版Gal Gadot！

迪士尼亦都將宣傳重點放喺「邪惡皇后」身上。Gal Gadot 喺上星期日（3月17日）單獨現身加州迪士尼樂園，為《白雪公主》真人版電影宣傳。佢同迪士尼嘅經典反派角色，好似Maleficent、Hades同Jafar，仲有米奇、米妮一齊影大合照。最特別嘅係，迪士尼一反常態，唔再鼓勵小朋友扮善良嘅「白雪公主」。Gal Gadot反而同咗一班扮邪惡皇后嘅小粉絲合照，場面溫馨又有趣。

不過，女主角Rachel Zegler 就冇出席今次活動，令外界更加猜測佢同姬嘉鐸之間係咪真係有「不和」嘅傳聞。無論如何，Gal Gadot 嘅演出已經成為焦點，相信觀眾都好期待佢喺《白雪公主》中嘅表現！