【過江龍】松屋牛丼！厚蛋三文治Egg Drop！2021年超令人期待10大過江龍餐廳
撰文：馬高斯 ｜圖片來源：各餐廳的Facebook專頁、官方網站｜編輯：海月
2021年超令人期待期待10大過江龍餐廳
1.松屋
繼上年進軍香港嘅Sukiya，日本牛丼御三家只係淨返松屋未喺香港插旗，小編好期待三間牛丼喺香港出現，始終多競爭先有進步嘛！松屋除咗牛丼之外，仲有燒肉定食、鍋物等等。順帶一提，松屋喺2018年已經登陸台灣，唔知幾時到香港呢？
2.Burger & Lobster
Burger & Lobster係英國相當出名嘅海鮮餐廳，最多人熟悉一定係啖啖肉嘅招牌龍蝦漢堡，以及龍蝦三文治，可以話係龍蝦控大愛，去親倫敦旅行嘅朋友都會必食！同樣食龍蝦，來自美國嘅Red Lobster已經登陸香港，唔知Burger & Lobster喺2019年登陸新加坡之後，有無計劃嚟香港呢？
3.松發肉骨茶
要數新加坡嘅美食，肉骨茶係必食！創立於1969年嘅松發肉骨茶，由昔日手推車賣肉骨茶，慢慢發展成人氣連鎖餐廳，仲係新加坡嘅米芝蓮推薦美食之一！呢度嘅肉骨茶會有陣陣蒜香之外，同埋黑胡椒嘅香味。
4.Egg Drop
要數韓國嘅「國民早餐」就不得不提食三文治嘅Isaac Toast。去到2018年韓國就出現一間主打食滑蛋三文治嘅Egg Drop，除咗招牌厚蛋三文治，仲有照燒牛肉同牛油果等等嘅選擇，唔少網民都覺得可以與Isaac Toast齊名。而且跟據韓媒報導過，Egg Drop有意進軍海外市場，唔該快啲嚟香港！
5.くら寿司
自從2019年壽司郎登陸香港，至今已開咗6間分店，第7間亦好快進駐屯門區！くら寿司同樣係日本嘅人氣平價迴轉壽司店，喺日本已有超過400間分店，加上2014年已經登陸台灣，原本今年打算進軍上海，不過因為疫情而延遲，照咁睇香港都有啲機喎！
6.Costa Coffee
Costa Coffee喺2010年成功超越Starbucks，成為英國市佔率最高嘅咖啡店，以及係英國最大型嘅咖啡連鎖店，至今超過30個國家已有分店，唔知幾時輪到香港呢？
7.程味珍
喺台灣已有40年歷史嘅程味珍，佢哋嘅招牌滷味同滷肉飯都係旅客嘅必點美食！好食到有代購網，幫人代購程味珍真空包裝滷味運送到港！台灣嘅老字號老天祿、師大夜市嘅燈籠滷味，喺2020年都相繼來港，睇嚟香港係有市場應該要考慮一下！
8.In-N-Out
美國嘅人氣漢堡店Five Guys、Shake Shack已經相繼登陸香港，美國人氣必食漢堡就只欠In-N-Out就齊腳！早喺2012年、2015年同2018年，In-N-Out曾經喺香港三度開設期間限定店試水溫，不過暫時都未見有開分店嘅消息。
9.Mister Donut
雖然Mister Donut嚟自美國嘅連鎖冬甩店，不過唔少人嘅印象可能會係日本，因為日本嘅Mister Donut推出好多特別嘅口味，又會有例如同Pokemon合作等等，小編私心希望香港快啲開分店！
10.艋舺雞排
艋舺雞排係台灣藝人NONO開設嘅炸雞扒店，曾經被台灣網民票選為最愛雞扒第二名。艋舺雞排喺英國、加拿大亦有開分店。2018年NONO開設嘅茶飲店花羨沐嵐已進駐香港，唔知艋舺雞排又會幾時嚟香港呢？
睇咗咁多間世界各地嘅餐廳，齋睇已經流晒口水，如果喺香港有分店可以去食就好喇！唔知大家又希望邊間成為過江龍嚟香港開分店呢？
