網民：根本就係換臉級別！日本女諧星Hara國寶級化妝術
廣告
【化妝術】唔知大家知唔知，化妝嘅「化」字係解做「化不可能為可能」，應該係，除非唔係！高超嘅化妝技術絕對遠超換面級，可以話係欺詐技術嘅最終奧義！日本有位女藝人以照騙為名，妝前妝後分別大到天堂與地獄級數。不過原來佢苦練化妝技術，背後原來有段故！
撰文：馬高斯 ｜圖片來源：PR TIMES、ゆにばーすIG、YouTube｜編輯：海月
日本女諧星Hara國寶級化妝
日本女諧星Hara係搞笑藝人組合「ゆにばーす」成員之一，作為一位諧星成日要扮醜上節目。而另一個身份，以佢高超嘅化妝技術，化妝後如同脫胎換骨，五官變得精緻，瞬間變身成氣質可愛小女人。不過當佢解除「最強欺詐化妝術」，用返素顏真面目示人，會見到妝前嘅佢有如蠟筆小新嘅眉毛，眼睛細如兩條線，顴骨同臉型較為粗獷敦厚，成日被人笑係男人同原始人。
睇返Hara嘅IG，喺未知妝前妝後係咩樣之前，唔少人會抱有疑問，點解IG會成日出現兩個唔同嘅女仔呢？當Hara公開咗佢嘅「最強欺詐化妝術」之後，對於妝前後轉變，網民都紛紛留言，「根本就係換臉級別！」、「妳iPhone嘅Face ID點樣解鎖？」、「睇到妳，我嘅人生又有返希望」、「根本就係詐騙集團！」、「我咩都唔講，只求化妝教學」。
Hara自已就唔太介意公開最醜同最靚嘅一面，不過亦有心累嘅時候，因為做女諧星最心酸嘅地方，就係要成日扮醜，會好容易搞到自己無晒自信。之所以苦練化妝，係希望有時候都可以打扮一下，似返一個普通嘅愛靚女仔。
Hara喺近年人氣都好高，甚至推出咗自己嘅化妝教學書《ゆにばーすはらの＃詐欺メイク》，仲喺去年4月開設Youtube Channel教化妝，由做丑角變身成美妝教主，其實都幾有正能量幾勵志！
