【藍橘子】《貪平參加平價潛水團，差啲連命都無》

內容由博客提供及授權轉載，不代表本刊立場

是咁的，我一直以來都好嚮往潛水呢樣活動。有次同女朋友去峇里旅行，聽聞海底好多珊瑚礁，心諗終於有機會了！

去到峇里當地，因為好多地方都需要用車，旅行社幫我哋安排咗個司機，每日去邊由我決定，司機再每日計算車費，就好似Taxi一樣，重點係司機識講英文，方便溝通。

我同司機講想去潛水，亦畀咗預先搜集好嘅資料佢睇。呢個時候惡夢就開始發生，司機話我搵嘅潛水好貴，佢知道有個地方，

只係需要畀一半價錢，就可以深潛半小時，仲有一對二私人教練添。

我呢種cheap精一聽到即時雙眼發亮，問清楚冇其他附加費之後，司機拍晒心口話OK～OK～，於是我就決定信佢一次。

去到現場，係一個完全無人嘅海灘。得幾個眼神銳利嘅當地人坐咗喺度，旁邊有幾件潛水衣好似晒咸魚咁掛咗喺度。

司機用當地語言同佢地溝通完一輪，其中一個教練叫我同女朋友各自換咗件潛水衣先，我發現件衫

有啲鬆，仲有少少穿窿，教練話ＯＫＯＫ…

另一邊廂，快艇已經準備好可以出發。我同女朋友坐上快艇，教練就帶我哋去潛水地點，佢話路程只需要十分鐘，而會喺呢十分鐘教曉我潛水。

我以為自己聽錯，定係教練講笑…潛水十分鐘學得識？有咩可能啊？

結果，教練完全無教我任何潛水知識，只係將兩個手勢教咗我…

一個係OK，一個係有問題，要上水。

眨吓眼嚟到潛水場地，教練亦一邊ＯＫ一邊幫我同女朋友戴好氧氣瓶，問我透唔透到氣，我一點頭，就二話不說就叫我哋落水。

我起初以為可以喺海面練習吓，試用吓對蛙鞋。點知教練喺我膊頭撳咗一下唔知咩制，我成個人就

不受控地沉咗落去。

落到海底，發現自己真係呼吸到，都唔算太驚嚇，教練亦開始好似拖狗散步咁喺海底四圍遊。但恐怖嘅事情就喺呢刻發生喇！

我望一望女朋友，發現佢個面罩完全入晒水，佢都不停指向上，話想上返水面。

本來我以為會同女朋友一齊上返水，點知教練用手勢叫我捉實海底舊石，然後擺出一個ＯＫ手勢，佢就帶我女朋友上返水。

而我，就被遺留咗喺海底，足足十分鐘…

當時我喺一望無際嘅海底不斷諗，如果教練搵唔返我，我又唔識點樣令自己浮，氧氣瓶大約只得半

粒鐘氧氣，我應唔應該吸一口氣，除晒所有潛水衣，浮上水面呢？

幸好，最後教練都有落嚟海底搵返我，潛水時間亦啱啱好夠三十分鐘，被拉返上水面。

總結呢次潛水經歷，我有一半時間係攬住舊石，心情驚多過開心。臨走前教練仲問我happy唔happy，我笑笑口，講咗句中文「ＯＫ你老…」

受到今次教訓，以後如參加危險性嘅活動，都係唔好貪平安全啲。

內容延讀：
【藍橘子】《有種生物叫「 正能樣 」》
>>> LIKE我們fb <<<
fb.com/newmonday.com.hk