text-藍橘子 photo-電視劇截圖、電影截圖、Youtube截圖 edit-希彤

部分內容由博客提供及授權轉載，不代表本刊立場！

任何人都會因為經歷過唔同嘅事，遇過唔同嘅人而改變。
細個影響你最多嘅係父母，大個互相影響嘅係伴侶。

細細個阿媽會發現你長高咗，粗口多咗，代溝多咗。
當你長大，除咗你阿媽，最能夠留意到你變嘅，就係女朋友。

仲記得以前發現自己有白頭髮，對住執鏡掹完之後望住佢，覺得自己長大成人，為工作而煩惱，仲仲有少少沾沾自喜。

但原來真正嘅「忙到老」，係工作忙到有幾多條白頭髮都無時間去理。

當你因為工作而愈來愈殘，第一個發現嘅係女朋友。佢仲會帶咗一堆護膚品威逼你搽，叮囑你唔好求求其其濕咗水當洗完塊面。
去旅行難免食多咗，平時又忍受唔住fb嘅邪惡宵夜post，結果幾乎每晚都習慣性食宵夜。

到你攬住女朋友時，佢已經發現「你係咪肥咗？」
「邊有啊…」連你自己都唔察覺，但女朋友就一手搣落你條腰度。
「肥咗啦你～死肥仔！」

女朋友除咗注意到外表改變，仲喺不知不覺間，令你性格上都開始產生變化。
就算自己一個人食飯，你睇餐牌開始習慣睇埋佢鍾意食乜。因為平時同女朋友食飯，就連食譚仔都係share餸黎食。
「帶遮啊。」每次落雨，佢都會提你帶遮，因為你肯定唔記得帶。
「落車記得拎遮啊！」因為你已經送過好多次遮畀巴士司機。
「晾乾把遮先好收埋啊。」你次次唔記得，把遮用幾個月就生銹，佢唯有次次提你…

　
隔咗五分鐘之後：
「我知你而家實係打緊機，你晾咗把遮先！咪當我講嘢耳邊風！」

女朋友已經成為你肚裡面條蟲，見到你無回應就估到係打緊機，你唯有死死氣去晾遮。

漸漸地，你個腦成日會有幻聽，聽到佢把聲，性格會變得愈來愈似佢。
佢亦因為成個腦都係要提醒你嘅嘢，變得愈來愈似你。

成日聽人講，同一個人耐咗會有夫妻相。
原來唔單止係個樣，連生活習慣、性格都會變得「夫妻格」。
所以話，愈瞭解你身邊嘅伴侶，其實就愈瞭解你自己。

內容延讀：

【藍橘子】如果呢個世界上有「老豆老母傳心師」就好了

>>> LIKE我們fb <<<
fb.com/newmonday.com.hk