【藍橘子】《同女朋友去廟街睇相，點知師傅話…》

「妳諗住問乜問題？」我問女朋友。
「其實我諗住你去睇啊，問你事業囉～」女朋友。
「但係妳一直話想睇喎…」我。
「我想你睇，反正你發達，我就有錢㗎啦～」女朋友。

我心諗無所謂啦，咪試吓準唔準囉～所以就將隻手掌同塊臉交畀相士睇。

佢用放大鏡睇啊睇，睇啊睇…又喺張紙上面寫啊寫…寫咗一堆唔係人類睇得明嘅得畫符。終於我忍
唔住開口問佢：

「點啊師傅？」
「我哋睇掌先，睇掌就係天生內在嘅命，面相就係外在，所有嘢都係注定嘅！」
「咁我條命點？」
「你條命唔算辛苦，唔會捱窮，放心。你條生命線斷開一截截，唔係話你會死，而係你人生有好大

轉變！」相士。

「大約幾多歲有轉變？」
「廿二啦！你自己諗吓有冇轉變？」

我回想起自己廿二歲嗰陣，每日就係返工、放工，根本無咩特別。

「無喎師傅。」
「哦！如果無嘅話，就係你錯過咗呢個轉變喇！因為當時你無把握！」

我心諗，師傅你頭先又話所有嘢都係注定嘅…

「咁我幾時再有轉機？你提一提我，我捉實佢啊！」
「三十四啦！你事業會有轉變，或者做自己生意…」
「咁我呢個轉變係好定壞？」
「睇你自己努唔努力喇！」

「即係呢…我想知如果我三十四歲有個機會，應唔應該去馬？定係維持現狀會比較好？」

「成功定失敗，有咩咁重要？失敗咗咁又點？你就係諗得太多，廿二歲先會錯過人生轉機！」

「……」呢一刻，我真係唔知可以講咩好。

去到相士幫我睇姻緣，其實我就無咩興趣，因為同女朋友拍咗拖十年，下年又結婚…仲睇乜鬼吖。
但女朋友講到呢part就突然變得好有興趣，捉實我隻掌拎畀相士睇，起勢咁問：

「點啊？佢會唔會有婚外情？佢錫唔錫老婆？將來有冇仔女？」

我望住興致勃勃嘅女朋友，將來有冇仔女，靠自己把握好過啦，問嚟做乜…

「睇佢個相就唔會有婚外情嘅，將來會有一個小朋友，或者兩個，甚至乎三個都有可能！」
「嘩…生三個我都唔係辛苦命，咁我將來應該好有錢喎…」
「靠你自己去把握啦～」

最後，我畀咗幾嚿水離開攤檔。原來已經凌晨一點…

我拖住女朋友，喺寂靜嘅廟街漫步，女朋友聽見我唔會有婚外情，心情好靚。

我突然間明白到一樣嘢，師傅講得好啱，人生都係應該自己把握嘅，睇相問長問短做乜呢…

內容延讀：
【藍橘子】《究竟要用幾多年，香港人去IKEA食飯識自己執餐盤》
>>> LIKE我們fb <<<
fb.com/newmonday.com.hk