【藍橘子】《仲要令幾多山頭淪陷，香港人先承認自己無公德心？》

到底香港人係有公德心？定係無公德心？　
Text-藍橘子 Photo:網上圖片﹑電影截圖﹑微博

【藍橘子】《仲要令幾多山頭淪陷，香港人先承認自己無公德心？》

每次討論呢個話題，總係有一堆人走出嚟講：「至少香港人唔會隨街屙屎屙尿！」

各位首先要搞清楚，呢樣係衛生常識嚟，唔隨街屙屎唔代表你有公德心。
我認為當一個地方，聚集到一大班人，就好容易睇得出有冇公德心。　

因為人嘅心理，愈多人做同一件壞事，「壞事」就會變成「小事」，到最後小事化無。
相信大家最常聽到無公德心嘅人反駁都係「唓！好多人都係咁啦！」
於是，山上嘅垃圾總係堆積埋一齊。當你手上有個飲完嘅膠罇，又自我感覺良好地諗：「好多人都係咁丟啦，丟埋一齊，人哋方便清潔，我已經好有公德心啦～」

伸手一拋，又製造多件垃圾，而你內心亦唔會有任何罪惡感。
真人有人處理垃圾？你唔肯定…
人哋會點樣處理？你唔想理…

點解唔將個空膠罇放入背囊，返出市區先丟入環保箱？
因為好多人最希望帶走嘅唔係垃圾，而係一張靚靚風景相，可以上載去面書、IG，表示自己親親大自然。
　老老實實，你其實只係破壞緊個大自然，大自然亦唔想被你親近。
按一下相機快門，照片就可以保留一世。
手中嘅垃圾一拋，大自然就永遠受到破壞。

香港人好鍾意追趕潮流，前幾年潮流興踩單車，就一班人妄顧交通安全…
前排興起跑步，就一班人自拍Full Gear，又貼自己跑咗幾公里嘅相上網。
而家興行山，個山就淪陷…

無錯，要成功做到環保、有公德心係一件好麻煩嘅事。
有咩方便得過隨手將垃圾丟喺地？我哋經常鬧強國令香港淪陷。
而家為貪圖一時方便，令自己居住嘅地方淪陷，始終唔係咁好嘛。

追趕潮流並非壞事，香港壓力大、空間少、人又多，培養一個興趣，行山出一身汗，呼吸吓新鮮空氣都係好事。

不過大家要搵嘅唔係咩隱世美景，而係行山需要注意嘅事項。
大家需要諗嘅唔係影張靚相keep一世，而係將個靚景保留一世。
 

內容延讀：
40歲仍是 小鮮肉？盤點5位娛圈凍齡男星
>>> LIKE我們fb <<<
fb.com/newmonday.com.hk