【藍橘子】《當唱K時「新歌試唱」一首都唔識，代表你老了》

以前返Part time，每個月出糧都會去唱Ｋ。自從轉咗辦公室返工，同同事唔係好熟，亦唔想太熟，
所以愈來愈少唱Ｋ。

「喂！嗱嗱聲點歌吖～計緊時㗎！」

以前入到房唔使十分鐘，已經點滿晒十幾版歌，但今次唔知點解，揀來揀去都係點得幾頁…

因為我同朋友都發現，『新歌試唱』一首都唔識…

以前點歌好似買馬咁，一見有人拎住遙控。
「１、３、５、６、７吖唔該！」
「我想唱７啊！」
「合唱囉！一人兩句！」
「挑，你走晒音，好難跟囉。」

就連唱緊歌嘅朋友，都拍拍我膊頭，豎起四隻手指，表示要幫佢點４號首歌。唱到中段，大家開始

鬥插歌，總有朋友自己唔點歌，但硬係鍾意爭咪唱人哋點嘅歌，貓頭鷹時段眨吓眼就過去。

當自己喜歡嘅歌手無再出現喺『新歌試唱』，或者係「你已經老了」嘅最好證明。
而你心目中嘅「飲歌」List已經變成「經典懷舊金曲」，播緊MV時仲開始覺得個MV娘味十足。

我朋友係Jay狂迷，佢每次唱Ｋ都淨係會唱周杰倫嘅歌《龍捲風》《半島鐵盒》《彩虹》…
再望住周杰倫《回到過去》嘅MV，就連會跟住周杰倫剪同一個髮型嘅朋友，都忍唔住恥笑Jay以前嘅髮型…

以前嘅Cool Cool憨男，而家已經結咗婚，仲做埋老豆。

當我去廁所經過其他房，聽見有幾間房竟然唱緊韓文歌…聽見好多人話最近睇香港樂壇頒獎禮好多

歌都係第一次聽，但另一邊廂，K房竟然有人唱緊唔係自己語言，背晒成首歌發音嘅歌。

正當我去完廁所想返返入房時，聽見前面有兩個後生仔經過我哋間房，講咗句：「嘩，咩年代啊唱
埋呢啲老歌！」

回想起當年，我經過走廊聽見Ｋ房入面有人唱《愛拚才會贏》，我都講過同一番說話。當時以為自
己嘅潮流永遠唔會過時，但原來不知不覺間，已經成篇文喺度「想當年」…

內容延讀：
【藍橘子】《同女朋友去廟街睇相，點知師傅話…》
>>> LIKE我們fb <<<
fb.com/newmonday.com.hk